Herrian bizi...
Borda, Itxaro
1
Sor lekutikan urrundu eta soinu hila da aditzen
Ordu berean minez bihotza zartatu arte loditzen
Negerra egin ezinean da begia seko gelditzen
Burrunba horrek zaituelako bildu nahian izitzen...
2
Zer balio du Euskadirentzat estali gorriz janzteak,
Larrazkeneko hegoarekin sarraskien ahanzteak?
Lurra utzirik joaten baldin bazaizko serre gazteak
Eta beharrak eman baditu lehen sehi emazteak...
3
Bertsoak ditut egun igortzen bihotzaren izenean
Haukien funtsa duzue segur ulertuko azkenean
Euskal herrian ogibiderik harentzat ez izanean
Adiskide bat nuen Parisen aspaldi hontan lanean...
4
Asko dirade hola joaten Euskal herritik hegalez
Ezin bestean hiri handirat herabetuak Ian galdez;
Guti dirade itzultzen berriz, nork daki zeren ahalgez
Badadukate frango entzunik lur zahr honen halez...
5
Parisen edo Bordelen berdin Frantziaren iparrean
Euskal gazteak ikusten dira lana egin beharrean
Noiz dute bada guk hautatuek ikasiko ondarrean
Gizona gizon izanen dela Herriaren indarrean!
6
Euskal herriko beso lerdenak ez ditzazten hor engana
Manatariek daukute denek goraki atzo errana:
«Euskal semeer abisu berri hau dugu orain emana:
Herritikkanpo rasai badago izerdiaren truk lana!»
7
Eta herria indarrik gabe hemen dugu ahuldurik
Gazten irria diru gutitan merkantarier saldurik
Gure kultura gure Euskara baserrietan galdurik
Aspaldi bada molde horretan gaudela gu zapaldurik!
8
Urtu nahian beldurra daukat gorderik nere gogoan
Ikararekin ezarria dut hitzaren bidez bertsoan...
Zergatik erran solas ederrak maitasunaren zoroan
Nik ere badut egun batean herritik beharko joan...