Haizearekin
Borda, Itxaro
Nahiz etorkizuna daukagun okerra
Mundu zabala dugu ederrez-ederra
Utzia dut hortako Euskadi bazterra
Nadin Amerika haietarat lerra...
Ameriketarat nik noizbait joatea
Ez nuen arresten ez hurbil izatea
Jean Urruty-k zerautan ireki atea
Urepelen eskainiz lehengo katea!
N.Y. zuri agurka nator oraindanik
Dakust altzairu eta zimendu jadanik
Zu hiri ospetsua denboran izanik
Gizonak uzten zaitu heriotz emanik.
Kantauri itsasotik lurraldean zehar
Sorbaldan gitartxo bat ninoake bakar
Dylan-ez aserikan soinu batek nakar
Koloradoraino dut hor segitu behar...
Ibaia Mississipi hau haundia da ikusi
Haren uhain urdinek gaituzte ilusi;
Beltzen kantu samina oihua iduri
Menphis-en beropean eder zaiku guri!
Delta Queen etsiturik badoa negarka
Aspaldiko untzia tristerik bakarka
Zubi gainean maite direnak besarka
Ari delarik gogor urean indarka...
Harlenm-en udak bero errazu Angela!
Zuriek derasate "negro" zaretela
Kotoin landetan zutik nagusi ergela
Beldurrez dago isil ezinez bestela!
Non zabiltz Wudi Guthrie jendean galdua
Denborarekin botza zaizu apaldua;
"This land is my land" hitza duzu zabaldua
Alta indina da preso zapaldua...
Eremuak haundiak dira diotenaz
Ez litazke hain azkar izanen bestenaz
Errezebitu behar nauena gaur denaz
Atsegin hartuko dut dadukan omenaz!
Itsaso haraindian joanik orduan
Gorputza koloradon, Euskadi goguan
Horrela hiru astez denbora bazuan
Euskaldun andana bat nere inguruan...