Gairik gabeko bertsoak
Borda, Itxaro
Nahi nituzke bertsoak egun
gai eder batetaz egin;
Poetek deitu barne tirriak
ni baitatik du aldegin
Neregogoan ez baitzaukan hor
merezi zuen atsegin
Goiz ahulean dut neroneri
norat den joan galdegin...
Bertsolaritzan badira segur
gai osoki desberdinak
Gaztentzat eta bai zaharrentzat
muga eginik adinak
Batzu goxoak besteak gogor
edo oraino gordinak
Beltzak xuriak gorri berdeak
zeru kolore urdinak!
Hemen dudatzen dut eta nago
Ez jakin zertan kantatu
Indar gabean nola dezaket
bertsoko gaia hautatu?
Beraz ezerez nahi dizuet
bozerditan solastatu
Jadanik hutsa hitzetan baitut
zuen aurrean plantatu...
Bizia dugu luzea eta
ardura ere karatsa
Ezdeustasunaz ezin bestean
galdu beharko dut hatsa
Nere baitako mundu ttikian
oraindanikan arratsa
Dago maizterra baitu manatzen
bizitzerako urhatsa!
Hitzak daduka, gure gogoan
zinez gaitzeko indarra
Bake sortzeko bihotzetan da
sendagailutan bakarra
Nere aldetik burutik minez
dutalarikan sukarra
Badut azkarki hitz lerrokatzen
artzeko barne beharra!
Euri hotzaren azpian gabiltz
hezurreraino bustirik
Aterbe baten xerkatzeko ez
ukanagatik astirik
Beti lasterka beti iheska
jauntzi faltsotan bestirik
Presorik dauden eskuak gordez
guretzat ez da eztirik!
Bizi naizeno herriko lurrak
gor ditut begiratuko
Euskal semea libre ikusiz
orduan naiz isilduko
Eta geroan paper xuria
zikintzetik geldituko
Nik idatziak su egiteko
didaztatela bilduko...
Ez nuen uste gairik gabeko
bertsoak in zitazkenik
Hutsez beteak hautsez beteak
egun molda nitzazkenik
Ezagutuko ahal dut noizbait
triste ez den larrazkenik
Eten gabeko bertso alde hau
bukatuko dut azkenik...