Etorkia liburutik...

Borda, Itxaro

 Zen sua.

 1

 Lehen egunaren xurian

 biziaren ixurian

 urak sua sutan agortu,

 bigarren argi egunean

 airearen lizunean

 ur hatsak belarra elkortu,

 hirugarrenekoan aldiz

 odolak, sapa itzaliz,

 zelula gorriak gogortu...

 2

 Laugarren eguna hastean

 haragiak, nahastean,

 izan negarren ihes portu,

 bosgarren eguna hiltzean

 leize hotsa ixiltzean

 lurreko azala legortu,

 seigarren egun nabarrean

 gizonak, bizi abarrean

 beraren izatea lortu...

 3

 Zazpigarren egunean

 gizonak Jainkoa sortu.

 Egiazki etzen pausa

 denborarik izan!