Ureztontzia

Arantzari, sendabelarra.

Ureztontzia bete eta euria ari du nire balkoiko oihan baldarrean. Ezkerretik eskumara, ur eske, oihuka, orroaka: izenik gabeko landarak, milorria, maria eta maria, arrosondoa, chrysantemuna eta mendafina.

Bazen garaia! diote aurrena Izenik Gabeko Landereek (etsaien etsaiek belar gaiztoak zainak luze diote, bai, belar gaiztoak esaten dute haiek) euria bere gainean ari baitu lehenbizi, eta nik barkatu, lanpetuta nabil, erantzuten diet, baina ez zalantzan jarri gero nire maitasuna, haiek ez baitzuten euren anonimatoa aukeratu, eta nire balkoiko oihan baldarrean ongi etorriak dira ezezagunak.

Oskarbia ureztontzian. Ureztontzia bete eta euri zaparradatxoa gero Milorriarentzako. Hiztegiek eta bestelako aditu miopeek Achillea millefolium esango liokete, nik the big big white avalanche zuri, milorri zuri, euria zuri bai zuretzat zuri. Eta berak uf! dio, uf! lodi bat, premiazko ufa. Barkatu, lanpetuta nabil, baina ez zalantzan jarri gero nire maitasuna, big big white avalanche oso txikia baitzen hasieran, eta sasoiko dabil honezkero. A self made flower da bera.

Lehortea ureztontzian. Ureztontzia bete eta euri erauntsia orain bi marientzako. Mari eta Mari. Jainkosa baten faltan, bi jainkosa. Eta haiek bueltan etorriko zaizu esaten didate aurpegi bihurriaz, eta nik ez dakit mehatxua den edo promesa. Barkatu, lanpetuta nabil erantzuten diet nik badaezpada, baina ez zalantzan jarri gero nire maitasuna. Mariek badakite heriotzaz haraindi ere bizi direla jainkosak.

Hutsunea ureztontzian. Ureztontzia bete eta sirimiria Arrosondoan eta Chrysanthemunean. Harrokeria handiz esaten didate ez daukazu fundamenturik. Arrapaladan nik barkatulanpetutanabilbainaezzalantzanjarrigeroniremaitasuna. Estutu egiten nau euren odol urdinaren berotasunak. Umore txarrekoak dira aristokratak, lorak badira ere, handiosak. Arrosak ez du onartzen bere bakardadea eta arrosondo esatera behartzen nau. Chrysantemun-ak ostera, latinez hitzegitera gonbidatzen nau manera handiz. Nik neskazahar zimelak deitzen diet batzutan, inork entzuten ez didanean, haserre nagoenean, lanpetuegi. Betiere maitasun osoz, ez zalantzan jarri gero nire maitasuna.

Zuloa ureztontzian. Ureztontzia bete eta ekaitza Mendafinan. Isilune umila eta zauritua botatzen dit aurpegira mendafinak. Bihotza urratzen didate bere begi borobil hezeek. Barkatu, lanpetuta nabil, baina ez zalantzan jarri gero nire maitasuna esaten diet, bihotzez. Mentha piperita izena ere erabilgarria iruditzen zait batzutan, mendafinak nire oihan baldarreko peoi berdeak baitira, nonahi aurki ditzakezu, eta eurak autoestimazio gutxikoak direnez, nik mentha piperita esaten dut batzutan amazoniako biologoaren plantak eginez.

Oskarbia, lehortea, hutsunea, zuloa ureztontzian. Euria bota du, ezkerretik eskumara: izenik gabeko landareetan, milorrian, bi marietan, arrosondoan, chrysantemunean eta mendafinan. Urik ez ureztontzian. Oskarbia, lehortea, hutsunea, zuloa ureztontzian. Nire balkoiko oihan baldarrean ez dago ur eske, oihuka, orroaka, sendabelarrik.

Jon Gerediaga