Zingira sargoietako kanaberaz

ta izarretatik ekarritako kontxaz,

egundoko sonajerua muntatu dizut

gure etorkizunaren aurrean

                         zintzilikatzeko.

Inoiz, gure etxera bazatoz,

musika piztuko dugu inguruko basoetan,

ta enbor heze kiskalien ke urdinaren liluran,

gustora egongo gara besterik gabe.

Ilunpeak argiz urratzen hasi orduko

kafesne bero bat prestatuko dizut,

laranja ta egur erreen usainez

goxatutako sukaldearen giroan.

Bidetxiorrak ikuskatzera irtengo gara gero,

laino arteko goiz zerrepelaren barrena.

Itzuli beharrez,

                         oroitzapenaren eremuetara

                         behartzen nauzunerako:

spray beltz bat erosi dizut

nire proposamen hau

zeure hiriko ormetan

argitara dezazun.

© Rafa Egiguren