III
gaur
zaparrada
noiz atertuko zain
aitor ezazu beraz
Garibay kaleko balkoipetan
gelditu behar izan dudan
ordu erdi honetan
neure aspaldiko lagun zintzo
isila
berriro bisitatu zaitut
Casa Paulista
Cafes Tostados
Garibay 9
eskaparatean
jendeari irrifarrez
aulkia atzekoz aurrera
jaka urdina
galtza kremak
kafearen aparra iduri
beti irrifarrez
Ducados bat hatz artean
zu ere zain
espaloinkari borondatedunak
sua noiz eskainiko
oh negro beltz gatibua
berriro mintzatu gara
miresten dut
zure pazientzia
zure eroapena
zure jasakuntza
ni ez bezala
hornitu zintuen naturak
noblea da zure eskaiola
flakoa nire haragia
eta
eurijasak jarraitzen badu ere
utzi egin behar zaitut
segi egin behar dut
gurutzbide nekoso huntan
posible baita
honez gero
mozkorren batek
berea zelakoan
edo listoren batek
arraza guztiz ugaria berau
beretzat
hartua izana
lehen bait lehen
behar dut arribatu
galtokira
ez nire guardasola
berezia edo apartekoa
delakotz
ez da bilkorra
udaberriko merkealdietan
erosi nuen
ez da automatikoa
izan nuen bakarra
bere gisa
irekitzen baitzitzaidan
ez gutitan
barrio humedoko
tabernetan
parrokianoen adar jotzeaz
aspertu nintzen artio
ez egundoko oroitzapenik
bururatzen didalakotz
tristea da gure bizitza
erotikoa
berria erosteko adina ere
irabazten dugu
komenio berriari esker
baina maite nuen nik
nire guardasola zaharra
jaun andreok
guardasola bat galdu da
Parte Zaharrean
gaur eguerdiko
hamabietatik ordu bietara
bitartean
tabernaren batetan
zihur aski
aurki lezanak
utz beza bertan
edo eta
999999
bederatzi bederatzi
bederatzi bederatzi
bederatzi bederatzi
urrutizkinera hots egin lezake
eskuzabalki
sarituko da
familiako oroigarria izaki
gezur hutsa
erran dukezu
egia borobila baizik
erran dizuket
ez didazu untsa ulertu
egia dela
gezurra dela
erran nahi nuela
baina
halaz guztiz ere
nire guardasola
berreskuratu nahi dut
ez da
jabego pribatuaren
goraltzea
solidaritate arazoa
baizik
nire obligazinoa da
nota utz nezake
nire dandy ezaugarria
edonoren esku zabarretan
ez nintzateke
euripean ibiliko
berrogei durogatik
ez naiz Juanito Mixeri
Bulebarreko semaforoak
pasatzen utz nazan
estoikoki
patrikak ere ezin itorik
burutik oinetaraino
blai eginda
berrogei duroz goitikakoa da
nire guardasola maitearen
balioa
funtsa
garrantzia
aurki ez baneza
Iesus Krist-en hatxurra berbera
harrapatuko dut
konszienteki eta erresponsableki
merezi baituk
nora nora joan nintekek
hi gabe
heu izanen haiz
nire suizidioaren arrazoina
Euskadik ez dik barkatuko
itxoin iezadak
konpreni ezazu
hura baitut
ligeak sinesten dizkidan
tobaritx burkide bakarra
orain agian galdua
ene Jinko Jauna
zer eginen dut nik
zer eginen dut nik
nire betiko
ezinezko amodioenaren
entzule zintzoa gabe
horregatik
hain zuzen
itzuli behar izan dut
ez nuke horditu behar izaiterik
horregatik
bakarrik
itzuli nahi izan dut
oinez
zaharrera
anaien feudora
euri hotz honek
euri zikin honek
busti nazan
izorra nazan
nire guardasola zaharra
ezin abandonaturik
Donostiako
Parte Zaharrean
Fermín Calbetón kaleko
Joxe Mari tabernan
ahantzi nuen
ahantzi ezin nuen
guardasola.