II
besoak luzaturik
eskuak zabaldurik
eta euria ari duela
konprobatuz
ozenki
egiten dut galde
barka iezadazu roiloa
zergati
zergatio gaur prezisamentean
ahantzi behar nuen
guardasola
zergatik egun hain zuzen
erradazu
hasi behar züzün
kasualitatez
zaparradaka
madarikatzen dut neure fortuna
guardasola
badakizu dakizunez
euritik babesteko gailua
makila batez
eta ziriren gainean
tolesten edo zabaltzen den
ehun batez osatua
injenio guztiz liluragarria
edo arestian aipatu dizudanez
beste anitz enplegutarako
erabilgaikizunkorra
beharbada
zeuri ere bururatu zaizun
bezala
parakaidas
paraxuta
edo jauzigailu
egokiago erranik
guardakolpe
hostiakoa
berdintsua izanen bada ere
gehienetan mortala
buruia
kanpandorretik botaz gero
egiteko kapablea naiz
aurkitzen ez badut
egungo guardasolek
hau eta bestea
erranagatik
ez baitute garai hartakoen
errematea
Paseo Nuevoko uhinek
azpian harrapatzen bazaituzte
hobe duzu
guardasola zabaltzeke gorde
bariluzik geldituko baitzara
halarik ere
ezagutzen dugu
oraindik
guardasola
tinko
gogor
fermu
sendo
gotor
bat edo beste
erran nahi baita
noizean behin
lege orokorra hausten duten
aleak bakanak baina
ageri ohi direla
bi pundu
Joanes artzainak
Urbiako zelaietan
eraso ekaitzpetan
erabilia
makal luzearen irudira zuzen
haritz gogorra bezain sendo
Marx anaiek
Urgulleko bide
galdu galgarrietan
Donostiako hiru damatxoekin
ilunabarrero
muturreoan aritzen zirenean
ume lotsagabeen begiradetarik
izkutatzeko
zabaldutakoak
nire lagun batek
69ko Aberri Egunean
Elkano kaleko
portal batetan
belarriluze belarrimotz
entzunzale
ikuskari
txibato
salatari
bat
nolabait erraitekotz
gaztigatzearren
dantzatu zuena
zuhurra izan behar baituzu
guardasola erabilten
ni
bederen
beldurrak hartuta
joaten nauzu
espaloietan gaindi
eudia ari duenean
begiren bat
ez dut errepuestokorik
aterako ote didaten
barila madarikatu batez
idem ere
neska txolina hoietako batek
zeren
mutilez gogoetan doazelarik
beren aurpegi ameslariek
aditzera emaiten dutenez
ez diren kontura jiten
eta honela bada
haien ibilaldia gertatzen da
kaltekorra eta hondagarria
gurearen aldean
hain gara guadasolari trebeak
non
munduak oro aitortzen baitu
zernahi zirkunstantziatan
profitatzen garela
politikoki
geure faboretan
konkista berriak egiteko
bertzenaz
Balda iezaiozu
X.X.-ri
eurixe hasi zuen
memento gogoangarri hartan
poltsatik guardasola bilkorra
atera zuenean
ea ahantzirik ote duen
aterki transportagarria
galankiro eskuinean hartuta
ezkerreko besoa
bizkarrean zehar pasa
eta eskuaz
lepondoa ferekatu nioneko
zirarra
hotzikara
ukitu kosmikoa
aitor ezazu beraz
ebiak badituela bere abantailak
ez bakarrik
nekazaritzarako
ni orain
hamorratzen ari banaiz ere
bakarrik bainago
bakarrik
bakardaderik ere gabe
zuk ez dakizu zer den
eta guardasola barik
horretxegatik
abiatu behar izan dut
eta ez bertze deusengatik
oinez zaharrerat.
© Koldo Izagirre