I
guardasola
hiztegi guztietarik desterratutako
aterkia
edo euritakoa
euskaldunok
xaguzaharraren hegalez
egin genuen
inbento nazionala
konkupiszenziaren kupula beltza
ibilaldi erromantikoren aterpea
guardasola
belaunaldiz belaunaldi
transmititu zaigun
erlikia saindua
edo Lehuntzeko
nire lagunak dioenez
parasola ere bai
euskal zibilizazioak
Hegelen piramidearena
berriro aipatuz
errotik aldatu zuen
eguzkitakoa
edo
itzalkia
Pernando Amezketarraren
lagun inseparablea
Txirritaren makulu inprobisatua
Louis XIV ere zalea omen zen
garaiko kronistek diotenez
eta guk somatzen dugunez
gentleman ororen
tresna
gailu
tramankulu
hatxamarta
edo traste
guztiz
praktiko
erabilkor
eta mesedegarri hau
nork inbentau
edo asmau zuen
jakin ez badakigu ere
beldurrik gabe erran genezake
eta erraiten ahal dugu
paleolitikotik hunat
iraun duen
huts orokorraren izpirituaren
tajuz
sortutako lore beltza dugula
anaien ausentzia
betiko itukin oportunoa
urtzen
etengabean
madarikatzen dut
burua
tantaka bustitzen didan
guardasola zaharraren
zuloa
hitzok beteko balute
poeta eta aristokraten
hornidura derrihorrezkoa
eta bitxi sofistikatua
izateaz bertze
hamaika beharretarako
ederki erabilia
hartaz baliatu baitziren
ez bakarrik
Lautreaumont küntia
josteko makinarekin
topa erazten duenekoan
baita gizon
xume
xehe eta arruntenak ere
eta adibide bat jartzekotan
neronen aitona aipatuko dut
pasada bat
iruditzen ez bazaizu
zeinak eguraldiarekilan
egin behar zukeen
eguraldiagaz
zehazkiago erran
konfunditu edo tronpatu
eta euskaraz adieraztearren
hankazuloa egiten zuenetan
txaketaren lepotik
bizkarrean behera
zintzilik
eramaiten baitzuen
gogoratzen naizenez
barrurantz dariola
zauriari
euria
barrurantz
zulaketa hotz bustian
barila tente herdoilduek
beren gauari bihurtzen dizkiote
adarrak
memoria ahula badut ere
aterki euritako parasola
eta guretzat guardasola delako
metalezko tresna
babesle zabalkorra
mota askotakoa da
gaur egun
zientziaren aurrerapenari esker
modelo berriak
ia egunero sortzen direla
ba al zenekiten
baina hala ere
gizonezkoarenak
badu bere ezaugarri aldaezina
hots
osea
c'est à dire
beltza izatea
beltxa
zure larrua bezala
baltza
unibertsitarien gibela bezala
baina ez iluna
beltza baizik
izpiritu
serios
delikat
eta landuoi dagokiguna
ez emakumezkoenak bezala
arroxak
loradunak
marraztuak
arinak eta funtsik gabekoak
begietara kalte egiten dutenak
baina hala ere
inor ez delarik biluzten
euripean
guztiek dute
elkarren arteko zera
edo tasun bori
h.d.
guardasola izaitea
plegablea edo bilkorra
garai batetan
Japandik Pasaiako portura
estraperloz ekarriak
eta nik behintzat
gitxienez dozena erdi bat
hor nunbait ahantzia
kirten-oker edo kakoduna
txit praktikoa
gerizen harrapatzeko
zankadila jarteko
edo zeinahi tabernatan
zintzilikatua ahazteko
eta poeta kaxkarren
errekurtso errepikatuak
ez kopiatzearren
hitz bitan erran dezadan
zurezkoa edo bost kilokoa
metalezkoa edo zibilizatua
lonazkoa edo apaizena
nylonezkoa edo andregaiak
erregalatutakoa
erraiteko asko lukeena
hitz bi
baino gehiago noski
gorringoetaraino baikaude
opari praktikoz
nire hamorrua mugagabea da
kontuz
mugagabea
nahiz eta
gure irudimen poetiko
harrigarriak
praktikotasunarekin zer ikusirik
ez duen
mila modutan
erabilten duen herraminta
noble eta leial hau
haizeak elektrikatzen badit
edozer astakeriaren egiteko
gauza naizen
erraiterako
sudur puntan
tente eduki
trago bakarrean
irentsi
autobus barruan
zabaldu
halakoa egin ninduen
naturak
eurizain izenda dezaket
guardasola
desafia zaitzaket
guardasola-duelora
nire aita elektrizista
eta nire ama
sagardotegiko alabaren
natura
egia erran exkaxak
zer eginen diogu
haurtzaroko oroitzapenetan
aparteko lekuan
ageri zait beti
paragueroa
© Koldo Izagirre