EGUBERRIETAKO ITZALDIA

                        «Laugarren doñuz»

Talde batek      Eguberriak zirala

                       —urrengo gaua izan Gabon—

                       Lendakaria mintza da

                       guzioi opaz Zorion...

Beste taldeak Mendietan, mutil guzti

                       suak piztuta antxen dagoz...

                       biotzak dar-dar, urduri,

                       aren abotsa aitzeko poz.

Talde batek         Andra ta ume eskaratzetan

                       aitona zarraren albo...

                       Guda ezkeroz, etxeetan

                       beste gizonik ez dago!

Beste taldeak Guda-Gabonak aurtengo...!

                       Elur t'odol mendietan...

                       Aitaren itzak aitzeko

                       Euskalerria ixildu zan:

Bertsolariak   «Anaiak, biar da Gabon,

                       biar Yaunaren Yaiotza.

                       Naiz guda bizian egon,

                       alai nai degu biotza!

Erriak            Arrotzak ostu ziguten

                       Euskalerri'ko bakea!

                       Au ezin izan Belen'en

                       ikasitako Legea!

Bertsolariak   Doixtar, Erroma'ko seme

                       ta moruak emen dira!

                       Asaba zarren ezurrak

                       lurpetik aiei begira!

Erriak            Nork arrotzari —galde naiz—

                       etxeko ate zabaldu?

                       Egin duanak ainbat gaitz

                       odol-negarra bear du.

Bertsolariak   Zazpireun urtetxo ibilli

                       morua uxatuz España'n

                       Orain aietxek ekarri

                       euskoak zapaldu naian!

Erriak            Etxeak autsi zaizkigu,

                       erriak sua artu dute.

                       Gazteak mendin ditugu,

                       errekak odol dakarte!

Bertsolariak   Bake-gizon, andra ta apaiz

                       iltzen dizkigutelarik,

                       nola dira ba, —galde naiz—

                       eleiz-gizonak ixillik?

Erriak            Iñongo laguntzik gabe

                       ludian bakarrik gera...

                       Gurutzean orrelaxe

                       zegoan Yaungoiko Bera!

Bertsolariak   Anaiak, ez izan beldur.

                       Egia beti nausitzen.

                       Urtero, neguko elur

                       udaberriak urtutzen!

Erriak            Egiaren eskutikan

                       goazen aldapa gora...

                       eguzkia biotzetan

                       naiz oiñazpietan loia!

Bertsolariak   Osto bi ez dira berdin,

                       ezta pinpilinpauxa bi.

                       Yainkoak ez zitun egin

                       berdiñak ludiko erri.

Erriak            Aiek nai geure Erria iltze.

                       Guk Ama bizitze gura!

                       Birrindu nai dizkigute

                       Lege-Zar, izkuntz, oitura...!

Bertsolariak   Ez diardugu uts-utsez

                       Euskalerria'ren alde.

                       Gabiltza zabaldu naiez

                       kristauen egizko Lege:

Erriak            Gizonak alkarren anai,

                       erriak alkarren lagun;

                       ez bata bestearen zai

                       noiz azpian artuko dun.

Bertsolariak   Gudari, euskal Gudari...

                       Biotz garbi, soiña lerden!

                       Eutsiok ire Lurrari

                       i aiz-ta bere itxaropen!

Erriak            Illik yausiko ba'intzake

                       Lurrari opaz odola,

                       iretzat izango ituke

                       Euzkadi'ko otoi ta lora...!

Bertsolariak   Odoletan sortua du

                       ama gazteak semea...

                       Odolaz lortuko degu

                       gure Erriaren piztea!

Erriak            Ta biar, guda ondoren

                       artzean Askatasuna,

                       zabaldu, erri osoan,

                       ogia ta alaitasuna!

© Telesforo Monzon