Urr 30 03

Txaman fantzinearen hirugarrena

Durangoko Txaman fantzinea egiten duten lagunak ez dabiltza geldi. Aspaldian bi zenbaki gehiago kaleratu dituzte, eta aste honetan berain 3. zenbakia sareratu dugu, eta hurrengo batean 4. zenbakia eskainiko dugu. Abenduaren 7an (igandea) Durangoko Azokako karietara testu errezitaldia egingo dute Atxo Fun Fun tabernan.

Urr 30 03

Evelyn Waugh-k 100 urte

XX. mendeko eleberri satirikoaren maisuetako bat dugu Evelyn Waugh, 1903ko urriaren 28an Londresen sortutako idazlea. Ironia eta umorearen bidetik jo zuen, eta jenero horretan liburu gogoangarriak ditu (A Handful of Dust, Scoop), baina besterik ere landu zuen (Brideshead revisited). Euskarara Juan Mari Mendizabalek ekarri zuen, 1995ean Milabidai bilduman Erein argitaletxearekin kaleratutako Dickens atsegin zuen gizona-n, non izen bereko ipuina eta Loveday jaunaren ateralditxoa ipuina agertu ziren. Evelyn Waughez Interneten topatuko duzu helbiderik (http://www.doubtinghall.com/, adibidez), eta BBCk 1960an egin zion elkarrizketa entzun dezakezu.

Urr 30 03

Etienne Salaberriren Ene Sinestea

Euskalzaleen Biltzarrak, EKE-k, Egan-ek eta Heletako herriak antolatuta, Etienne Salaberriren inguruko jardunaldiak burutu dira joan den astean, igandean Heletan idazlearen omeneko eguna ospatuz. Izan ere, aurten bete da (otsailaren 16an) Salaberriren jaiotzaren mendeurrena. Idazle heletarraren Ene Sinestea liburua eskaintzen dizugu osorik, aste honetan. 1978an kaleratua, idazlearen autobiografia modukoa da, bere bizitzaren eta pentsamenduen berri ematen duena. Orobat, mendeurreneko egunean Euskaldunon Egunkaria-n (kazeta itxi baino lau egun lehenago) plazaratu artikulua ere eskaintzen dizuegu, Etiennne Salaberriz Jean-Louis Davantek egindako zutabe argigarriarekin bat.

Urr 30 03

Pako Aristiren poemen faksimilea

Sakelako kaiera batean eskuz idatzitako poemak argitaratuko ditu Pako Aristik Libreta horiko poemak izeneko liburu berrian. Azaroaren 7an (ostirala) 11:00etan Donostiako Bilintx dendan aurkeztuko du, Harkaitz Canok lagundurik. Plazara agertu bitartean, poema liburuaren edergarri eta lagungarri, hementxe daukazu Pako Aristiren sakelako libreta hori osorik, idazleak idatzi bezalaxe: eskuizkribuaren faksimilea, alegia.

Urr 23 03

Galeusca Gernikan

Historia eta oroimena gaitzat harturik azaroaren 1ean (larunbata) eta 2an (igandea) Galeusca burutuko da Gernikan. Larunbat goizean, aurkezpenak oro egin ostean hiru lantalde osatuko dituzte: Lehenengoan Fikziozko memoria gaia landuko dute: "Trantsizioaren oroimena" landuko du Jon Kortazarrek, "Novel lar la guerra civil per als lectors del segle XXI" Josep Françesc Delgadok eta "Divagación sobre a novela histórica e as nacións sin estado" Darío Xoh´n Cabanak. Bigarren talde batean memoria pertsonalak aztertuko dituzte. Joxemiel Bidadorrek "Euskararen memoria Nafarroan 36ko gerran: Larrekoren Gerla urte gezur urte" izango du hizpide, Armando Requeixok "Literatura do eu: autrodiéxese e historia no ensaísmo galego actual" eta Salvador Jáferrek "Exilis, deserts, pelegrinatges". Hirugarren lan talde baten poesia eta antzerkigintzaz jardungo dira. Xipri Alberbidek Piarres Lafitte ekarriko du gogora, Inma López Silvak Galiziako poesia eta antzerkia eta Rosa Calafatek Kataluniako poetak.
          Mahainguru eta hitzaldiez gain, ikuskizun bat ere izango larunbatean 22:00etan Gernikako Lizeo antzokian. Aitzpea Goenagak aurkezturik, Hasier Etxeberriak testu bat irakurriko du, Asier Serranok poema batzuk musikatu eta ostean Harkaitz Canok idatzitako “Ixteko ordua” antzezlana jokatuko dute.

Urr 23 03

Mansfielden Lorategiko festa

1922an kaleratu zen Lorategiko festa eta beste kontakizun batzuk, Katherine Mansfield idazle zeelandarraren azken liburua. Hurrengo urtean hil zen, 1923an, 35 urte zituela. 1888ko urriaren 14an jaioa zen Wellingtonen bizitza labur baina bizia izan zuen emakume hau. Lorategiko festa eta beste kontakizun batzuk narrazio liburua Anton Garikanok euskaratu zuen eta Ibaizabalek kaleratu Literatura Unibertsala bilduman 1998an. Osorik irakur dezakezu euskarazko testua (hala-nola ingelesekoa ere). Autorearen berri Garikanok berak ematen du liburuaren hitzaurrean.

Urr 23 03

Juan Ignazio Iztuetaren olerkiak

Astero liburu bat eskaintzeko ekimenean orain 25 urte kaleratutako hauxe dakarkizuegu: Iztueta’ren olerkiak. Kardaberaz Bilduman argitaratua, Jose Garmendia Arruebarrenarena da edizioa; berak egin zuen J. Ignazio Iztuetaren poesia eta bertsoak biltzeko eta prestatzeko lana. Bere aurkezpenez gain, Manuel Lekuonaren hitzaurre bat ere badu liburuak, eta lanaren mamia: idazle zaldibiarraren 70etik gora olerki.

Urr 16 03

Gabriel Arestik 70 urte

1933ko urriaren 14an jaio zen, Bilboko Berroeta-Aldamar kalean, Gabriel Aresti idazlea. Euskal literaturari astinaldia eman eta gure letren ikur bilakatutakoa, 30 urte zituela jaso zuen, 1963an, Orixe Saria bere lanik izendunena bihurtua den Harri eta Herri liburuak, eta 1964an argitaratu Itxaropenan. Poeta bilbotarraren lanak irakur ditzakezu Susa argitaletxearen web orrialdean, eta bere ahotsean entzun bere lau poema.

Urr 16 03

Italo Calvinok 80 urte

Orain 80 urte, 1923ko urriaren 15ean jaio zen Italo Calvino, idazle italiarra, Kuban jaio hain zuzen ere. II. Mundu Gerrako bere esperientzia jasoz egin zuen jauzi liburuen plazara, Il sentiere dei nidi di ragno-rekin, eta gerora hainbat eleberri eta narrazio liburu idatzi zituen. Literaturaren baitan eremu oso diferentetan aritutakoa, horren erakusgarri dira euskarara itzuli diren bere bi liburuak: Bizkonde erdibitua eta Marcovaldo edo Urtaroak Hirian, Iñaki Ugarteburuk eta Koldo Bigurik hurrenez hurren euskaratuak. Horiez gain, baina, literatur aldizkarietan Italo Calvinoren beste lan batzuk ere kaleratu dira euskaraz eta hemen eskaini nahi dizkizuegu.

Urr 16 03

Liburu bat astero: Hilargiaren hotzikarak

Hogeita bost urte bete ditu Pello Lizarralderen Hilargiaren hotzikarak liburuak, aste honetan osorik eskaintzen dizugun honek. Bere estreinako liburua da (gerora E pericoloso sporgersi; Hatza mapa gainean; Sargori…), Ustela Saileko zazpigarrena, eta Joxe Artolaren azal eta irudiez ilustratua dator. Ondorengo lanetan baietsi duen estilo berezi baten jabe, poema, narrazio labur eta apunteen arteko muga lanbrotsuan dabil idazlea Hilargiaren hotzikarak liburuko 18 piezetan.

Urr 09 03

Txinako Tang poesia Rafa Egigurenen eskutik

Rafa Egiguren idazleak Tang dinastiako 30 olerki batu ditu disko batean, euskaraz eta txineraz eta Joserra Senperenaren pianuarekin grabatu ditu disko batean kaleratzeko. Urriaren 19an (igandea) 20:00etan errezitaldi musikatu bat egingo dute Bilbon eta poemak txineraz eta euskaraz errezitatuko ditu Egigurenek, Ramon Agirreren laguntzarekin. Irudiak Jose Luis Zumeta pintorearenak izango dira eta pantaila handi batean proiektatuko dituzte.

Urr 09 03

Udazkeneko liburuak Berrian

Uda ostean hasi eta Durangoko Azokara bitarte argitaratuko diren liburuen zerrenda eskaintzen du Berria egunkariaren guneak. Orotara 72 egileren lanen berri ematen du guneak; nobelak, ipuin liburuak, poesia, Saiakera, kazetaritza eta lekukotasuna, haur eta gazte literatura, berrargitalpenak eta itzulpenak sailetan.

Urr 09 03

W.H. Auden hil zela 30 urte

1973ko irailaren 29an zendu zen, Vienan, Wystan Hugh Auden poeta ingelesa. 1907an jaioa, 1928an bere estreinako poema liburua, Poems, argitaratu zuenez gero, sona handia erdietsi zuen. Hainbat poema-liburu eta prosa eta antzerki lanak kaleratu zituen XX. mendeko poesia ingeleseko ahots inportanteena bilakatu zen Audenek. 1994an kaleratu zuen W.H. Audenen poema antologia Susa argitaletxeak, Juanjo Olasagarrek prestatu eta euskaratua. Osorik irakur dezakezu hemen.

Urr 09 03

Juanra Madariagaren Izozmendiak

Izozmendiak izango du izenburua Juan Ramon Madariagaren zazpigarren poema liburuak. Madariagak joan den igandean Cho Oyu mendiko gailurrera igotzea lortu zuela-eta, gure zorionak harentzat eta zuentzat liburu berriko zortzi poema. Izozmendiak bi aste barru aurkeztuko du Susa argitaletxeak Bilbon, idazlea Tibetetik itzulitakoan. Madariagaren Galera errepikatuak liburua osorik emana duzu sarean.

Urr 02 03

Literatura eskola Larrabetzun

Bihotz Bakartien Klubak irakurlearen matxinada aldarrikatzeko Literatura eskola antolatu du urriaren 18an (larunbata) hasi eta ekainaren 12a (larunbata) bitarte. Eskolen ardura Iñigo Aranbarri idazlearena izango da, baina hilero gonbidatuak izango ditu: Jose Luis Otamendi, Mikel Elorza, Alberto Barandiaran, Koldo Izagirre eta Kirmen Uribe besteak beste.

Agenda

Efemerideak

Kritikak