AMAIA
Nere antzineko abesti zitalak
Eta nere ames aztun ta gaiztuok
Lurraldu daiguzan, ta horretarako
Ekarristazue zerraldo handi bat.
Sartu eingo dodaz hilontzi barruan
Ixilik euki nahi dodazan gauza asko;
Eta zerraldo hori, Heildelberg-upela
Baino handiagoa behar da izango.
Oholezko balarta sendo-lodi batzuk
Ere ekarri begiez hainbat lasterren;
Magunzia-zubia baino luzagoak
Izan behar dira balarta horiek.
Gainera ekarri ein dagiezala
Hamabi erraldoi, ta izan daitezala
Kolonia-huriko gotertxaunan dagon
Deun Kistobal baino indartsuagoak.
Eurak eroan eta jaurtiko dabe
Zerraldotzar hori laster itsasora;
Itsasoko hobia behar dau nahi ta ez
Zerraldotzar horrek, hain handia izan da.
Ez al dakizue zegaitik behar dan
Hain handi ta astuna izan zerraldo ori?
Nere oinazea ta maitetasuna
Nahi dodazalako bertan, betiko itxi.