XLIV
Ai, amesetan nengoalarik
Negar ugari egin dot;
Hil zintzazala, enetxu hori,
Ames egin neban atzo.
Itxartu nintzan une ber-bertan
Ta nere masailetatik
Malko beroak, garbi-garratzak
Jausi zirean, ugari.
Ai, amesetan nengoalarik
Negar ugari egin dot;
Ahaztu zinala nigaz, urduriz
Ames-egin neban atzo.
Itxartu nintzan une ber-bertan
Ta nere malko lodiak
Tantaka jausten ikusi neuzan
Lurra bustitzen ebela.
Ai, amesetan nengoalarik
Negar ugari egin dot;
Maite nozula gogoz oraindik
Ames-egin neban atzo.
Itxartu nintzan une ber-bertan
Ta nere malko-ujolea
Gehitu-zabaltzen laster hasi zan
Gero eta handiagoa.