ERIO DUT LAGUN
Une oro alboan,
erio, zaut lagun:
egunez eta gauez
etzabilkit urrun.
Nire ametsak oro
egin dira lurrun,
zeuretzako baituzu
nere zain eta gun.
Neregan il da beingoz
aurtzaro garbia,
itzali zan betiko
orduko argia.
Gaztetan biotza nun
sutan izekia,
iduri aurkez dudan
garmendi aundia.
Aspaldidanik nauzu
garako gizona,
urteok egin ninuten
adiskide ona.
Laztandu gogo zaitut,
erio amona,
zurekin bat eginik,
dezadan zoruna.
Masustak lez izan naiz
aurtzaroan zuri,
biotzaren su-garrez
mutiletan gorri.
Aguretan beltz nauzu,
gogoa egarri...
naizen au eri(o) orrek
noizkoan irentsi?
© Iokin Zaitegi