EGUZKIAK MUN
(Non bizi naizen eta zertan diardudan
galde egin didan adiskideari, maitez).
Baratzaren erdian
dizut basetxea:
esi aurretik doa
auzoko bidea:
oianak itzalpean
du etxe-ostea,
bertan bizi naiz pozik
barnean pakea.
Nere gelako ormetan
eusko-lurrak ditut,
aberria gogoan,
erbestekoa ut:
egun sargorietan
sagardoa zurrut,
osasunez sendorik
irrintzi dagizut.
Goizean iratzarri
eta leio zear
eguzk(i) izpiz batera
txoriak deadar:
txistuok entzun-ala
irriparrez kar-kar
gogora baitatorkit
euskal-egunabar.
Goiznabar berriaren
olerki au onduz,
orribiko eginda
birbizturil, naiz suz.
Garerdiko gizona
ari naiz minduruz
itsaso zabalean
ildoak urratuz.
Irakurri-orduko
itz-neurtuok, lagun,
zoli entzungo duzu
baserriko oiartzun:
Aberri osoaren
lurberriak lurrun
iario, eguzkiak
egingo dizu mun.
© Iokin Zaitegi