ALDA-EGAZTIAK
Arru gaiñak gora dator arrats-itzal,
ta etxe-aurretan illuna da zabal.
Bide zear beso-lagun dut gogoa,
ene biotzeko emazte zintzoa.
Gaua eguzkiak omen du maitemin,
iduri alargun begi-beltz atsegin.
Illunak xaguxar-beturdin taldea
azkatu ta argitu du nere barnea.
Gabaren ederra oial urdiñetan!
urrutiko ots miñak ematen dute urran.
Ozkarbi izartsuak barna, alda-egazti
saillak doaz, urrun-miñez, ikarati.
Aien txiomiñak entzungarri ditut:
yarn naute gora begira buruzut.
Izotz-aldeetatik igesi dioaz,
egutera billa, giro obeak opaz.
Zeruan zabal da Garaikunde-ikurra,
datozten erritar berrien agurra.
Goitik bera dator ego ukaldia,
ezin baña, ikusi aien iduria.
Ene baitan beste aieru erne zait:
egaztien ega-otsa ez da nonbait.
Txiomin eztiok eusko-olerkarien
abesti goxoak agian, izanen.
Itz egakariok oraingoan illun,
eusko-olerkaria yoan bai-doa urrun.
Giro obeak opaz atzerrira doa:
ta bidez alaitzen illunen gogoa.
San Salvador (El Salvador)
© Iokin Zaitegi