AMETS-TXORIAK

Badiyoaz udako atsalde urdiñak,

gauak luzatuaz ta laburtuz eguna,

biotzak naigabea, begiak illuna,

ta badoaz ainara ega-beltz ariñak.

Gaztaroko goiz-amets zuriak badoaz.

Ara! itsaso ertzean euzki biribilla

egitera diyoa oi duan murgilla,

biotz-ausiabartzak argitan yarriaz.

Irriyario zana nabari zait belun.

Norantz zoazte arin gaztaroko amets

ta ainara bular-zuri? Zuek gabe ezin ets!

Zelaian lorerik ez eta biotza illun.

Txorion yarrai yoan naiaz dut biotza.

Ai nintz egoen yabe! agur, ainara arin!

Agur dizut udako arratsalde urdin!

Ezurrak sutan ditut, ta gogoa illotza.

Marneffe (Belgique)

© Iokin Zaitegi