TORI NIRE EDONTZIA
V'garren Olerti eguneko guduan
zillarrezko aritz-abarrez sariztatua.
Tori artzai-ontzi au, olerkaria!
Txatxarra izan-arren, abenda-odolez
igortzi eta aren gogoaren atsez
lurrindu baitizut nire oparia.
Aitonaren aitak asi zun arloa:
oianean ezpel-makilla ebaki,
ta pitxi bait-litzan landu dut poliki...
Azaltzera noa gure lan-asmoa.
Belarra-morrozten ardia dakusgu:
bildotsen pakea begi-biotzetan
izaki, ordeka erdiko aitzetan
exeririk aizto-utsez egin dugu.
Edontzi-inguruko azal-goi batean,
artzai-bizitzunak irarri genitun:
euzki biribilla etzatera, an... urrun.
Baseliz-gallurra yartzen du argitan.
Urrutx-makilla artu eta artzai gaztea
txistu-yoka mendi gorantza diyoa.
Erpin-goiak igo ta ardi erdiloa
txistu zorrotz otsez itzar da maitea.
Berealakoan, bidetxigor zear,
berago ikusten dan txabolara doaz
ardiak. Artesi baten bereziaz
batzekoak, itxi oi du ataka azkar.
Umedun ardiak etzalekurantza
doaz. Be-aldean, kaikua istar-arten
loturik, badago artzai esne-batzen
aren asmoa ba-doa arat-onuntza!
Irudin dagonez, batzu izuti-uzkur,
bestetzu otzanak dira batzekoan.
Otzanak, lepoker, ausnarka dagoan
antza du, geldirik eta ipurdi-makur.
Izuak artzaiek beregana ditu,
ontziratzeraño errape: istarretik
oraturik dakarz. Erro banetatik
esku biaz eldu ta laixter yeixten du.
Erroberoa ba-dator txirrioan...
Batutako esnez kaikua gañezka,
bits zuri arroa dula yarioka
dager irarririk ontzi-azalean.
Beste goialdean, bertsolari zarra,
eskuan sagardo edontzia izaki,
itz-neurtu ederrak esanaz yarraiki.
Inguruko gaztek ezpaiñetan parra...
Beraxego, itsaso geldi-ezin barna
arrantzale beso aunatuak ager.
Goiznabar miñean uretan lur musker
dakuste: aize da-ta, yitoan txalupa.
Txopa-aldean zutik lemazain sendoa,
ta begiak fir-fir lurra ikustekoan.
Begi zimur ta ille zuri agure izan
arren, zaiñak lertu zorian lepoa.
Irudi guziak bizi-bai-bizirik
ziruditen: orren ikusgarri zegon.
Ontzi berriaren usaia zerion:
egundo iñork ezpai-zun edan oraindik.
Aurten, udaberriz, buka dizut lana.
Inguruko pago pertxentak orrimin,
ta nire barruan biotzak neskamin...
txori bi egaka zeru garbi barna.
Ordun, zagi bizi lez, biotz azia
lauskituaz, asmo eder aratzena
ereika atera-ta, ontziaren barna
yalgi dut, iduri larrosa gorria.
Barnean asmoak irakin dagio:
gaiñeratu nitun oroipen goxoak,
ipui zarren ezti eta gogo-ikarak...
ardo zarren zillar-aparra dagio.
Ikusten dezunez, edontzi onetan
eusko-bizikera eden nai izan dizut:
zure olerkien ordaiez damatzut,
edan zazun gogoz idatzi-aurrean.
© Iokin Zaitegi