Olerkaria

JOSEBA SARRIONANDIA

Hnuy illa nyha majah yahoo, 1995

Goiz eder onetan erail bear nabe                                         Txindor baten txintak gozotan nabela?                                         El naiten leyora begiok intz-gabe                                                                 Esteban Urkiaga   Neskutsak ez dira lorategi apainduetarik irten                         gudariak zerraldo erortzen diren artean. Olerkariaren gorputz sakonegiak ez du oraindik igarri                   betazaletan pilatuko zaion elurraren astuna. Nork ez daki, berak ezik, Gernikan edo Gasteizen                     fusil zuloek hartu eta afusilatuko dutela? Behelainotan harrapatuko dute, ez du «ekibokazioa da                                 ni ez naiz esteban urkiaga» esango. Loreek, beren latinezko izenak oroitu ezinik,               kea edanen dute harik eta suak hartu arte. Eta elaiak aide hautsiaren arrailduretan ibiliko dira             agonia errautsak habiak eraikitzeko biltzen. Eta mundua zabore gabe geratuko da laster, heriotzera                                 kondenatuaren azken afaria bezala. Eta olerkariaren bularreko zauriek hondakin kriseilu lez                     argituko dituzte arrasberak eta bide berriak.