Ekainaren 26 egun

GABRIEL ARESTI

Harrizko herri hau, 1970

Hogeita hamar urteko astearen luzatasunetik hartutako atseden hartan, latinak halako euskaldun kutsu bat zian aldaretik kulpitora, eliza zahar hartan.               (Orduan zituan hogeita hamar urte             euskaldun poetaren             heriotzetikan).   Aldatu nian liturjia:         Ez zen gure poeta       saldu lau pezetan,       eta ez zen ibili       bide errezetan.         Oraindik bizi dela...       Ez nago txantxetan.       Harekin gertatzeko       nabil ametsetan.   Limosna bat Purgatorioko arima gosetuen alde, Malthusen teoria madarikatuak ez daitezen bertan ere egiazta...   Eta aldatu nian dotrina:   LEHENBIZIKOA:     Ez ezakezue poetarik asasina. BIGARRENA:     Ez ezakezue pintorerik kartzela. HIRUGARRENA:     Ez ezakezue euskal mutilik desakra. LAUGARRENA:     Ertzaintzan ez eukezue pederastarik. BOSGARRENA:     Ez ezakezue herririk deserri,     eta deserriturik ez ezakezue masakra. SEIGARRENA:     Ez ezakezue larrosarik bortxa. ZAZPIGARRENA:     Rikardo bezalako beste baten heriotzaren notizia jakinaraziko zaizuenean, ez ezakezue langostinorik jan, eta janen baduzue, ez albaitzindoazte haren honretara. ZORTZIGARRENA:     Ez ezakezue euskaldun haurrik ikastola:     Eskola ezakezue. BEDERATZIGARRENA:     Ez ezakezue Lurdesengatik gaitzik esan. HAMARGARRENA:     Ez ezakezue Arestirengatik onik esan.   ......................................................   Ez. Ezteberen heriotzarik ez diat meza batengatik barkatuko!