V

eta orain

boza ere kendu didatenean

nola kantatuko dut

arimaren atsekabea

bizitzaren nekea

behar dudan guztiaren premia?

Hitzik gabe

nola eman

egunero behar dugunaren berri?

Nola adieraz

bagarela

eta ez garela izanen

eta garen

eta izatea nahi dugun pixka ere

ari zaizkigutela kentzen,

arima erdi-erditik puskatzen?

Nola prometi

izan gaitezkeela hobeak

kendurik oraingo nekeak?

Egun

ogia ebasten badigute

bihar

haizea ere

pozoinaz beterik emanen digutela?

Nori kanta

entzumena ere ohostu badigute?

nork altzatuko du boza

dorreen gainetik

fusilak dituela aurrean

denok heriotzaren atetan

bakarrik abandonatzean?

Herri Behera lehor

gelditu bada

zeinek bustiko ditu

gure eztarriak

eta idekiko belarriak?

Eskurik gabe

zeinek eginen digu ogia,

zeinek prestatuko

izpiritua mantentzeko janaria?

Nork laztanduko

neskatxa gazteen bularrak

eta titia eman haur ttikiei,

bularrak ere moztuak izanen zaizkien egunean,

gizaki guztiok hilotz gelditzean?

© Mikel Arregi