EPIGRAMAK

            XLIX

lakuan erloju naufragoak

koloretako klarionez pintaturiko ortzetan

zintzilik urkatuak

eta sasitzan masustra bi zure begiak

            L

hilei deitu eta

erantzun egiten dute

biziei deitu eta

ez dute erantzuten

            LI

izpilu hautsiaren zatiak bezala

poema hauk ere

osoago baten puskak dira

eromenarenak edo

            LII

horra hor haren gorpua

ez zen esnatu argitasun goibelak lehendabizi

eta gero lehen eguzki errainuek

begi irekiak argitu arren

            LIII

lurraren sabela babesten iraunen diagu

hilarri abailduok

hezur ehortziak bermatzen

eta hire haiduru

            LIV

ateak hertsi buhameak heltzean

hilerrietan lo eta katuez elikatzen direlakotz

eta haurrak ohostu

eta hurrutian saltzen dituztelakotz

            LV

eguzkiloreek

ez zekiten norat beha

hain bait zen

eguzkia dirdiranta

            LVI

neskatila itsuaren

zurezko begiak dira

deusetara begira

begirik ederrenak

© Joseba Sarrionandia