VI

ABRAHAMEN OTOITZA

                                        (Etor. XVIII)

(Oihal aintzinean)

Kantariek

                Manbreko      haitz-ondoan

                Oihal-etxolaren      aintzinean

                Abraham zagon      eguerditsutan

                Eta Jauna      zitzaion iragan.

                Begiak      altxatzean

                Ikusi zituen      aintzinean

                Hor hiru gizon      xutik so hari:

                Joan zen eta      ahuspez erori.

Abraham 1

                Zure begieri,

                Jauna, laketgarri

                Banitzaiote:

                Ez, otoi, iragan

                Ene aintzinean.

                Gelditu gabe.

Kantariek

                Mambreko      haitz-ondoan

                Oihal-etxolaren      aintzinean

                Abraham zagon      eguerditsutan

                Eta Jauna      zitzaion iragan.

                Begiak      altxatzean

                Ikusi zituen      aintzinean

                Hor hiru gizon      xutik so hari:

                Joan zen eta      ahuspez erori.

Abraham

                Oinak garbi eta

                Pausatzeko etzan

                Haitz hunen pean.

                Jan piska bat eta:

                Ogiak pitz beza

                Zuen bihotza.

Hiruek

                Egina izan dadila

                Diozun bezala.

Kantariek

                Manbreko      haitz-ondoan

                Oihal-etxolaren      aintzinean

                Abraham zagon      eguerditsutan

                Eta Jauna      zitzaion iragan.

Jauna

                Nun ote da Zara, zure emaztea?

Abraham

                Oihal - etxolan.

Jauna

                Etorriko nitzaitzu berritz helduden urtean.

                Ukanen du Zarak orduan semea.

Zara

                Ai! ai!

                Orai,

                Hoin higatua, nik ezagutuko atsegina?

                Hoin zahartua dutalarik ere gizona?

Jauna

                Zertako egin du Zarak irri?

                Deus ote da sobera

                Jaunarentzat miragarri?

                Sasoin berean,

                Helduden urtean

                Behar nitzaitzu berritz etorri:

                Seme baten ama izanen da Zara.

Zara

                Ez dut irririk egin.

Jauna

                Irri egin duzu, bai, zure buruarekin.

Jainkoa

                (Soinu)

                Abraham baitut adiskide

                Hari nola gorde

                Zer dutan

                Gogoan.

                Zeruetaraino dut aditua

                Zodom eta Gomorren kontrako oihua:

                Handia da handia heien bekatua.

Abraham

                (hurbilduz)

                Bekatorosekin

                Suntsituko duzu gizon zuzena?

                Nork daki Gomorren ez ote diren

                Berrogoi ta hamar gizon zuzen?

Jainkoa

                Berrogoi ta hamar gizon zuzen

                Balin baditut kausitzen

                Ez dut hiria suntsituren.

Abraham

                Barkatu, Jauna, bainaiz hoin ausarta:

                Hauts eta errauts izaki-eta

                Bainan, Jainkoa, bortz gizon zuzen

                Dire beharba eskasturen.

Jainkoa

                Berrogoi ta bortz gizon zuzen

                Balin baditut kausitzen

                Ez dut makurrik eginen.

Abraham

                Bainan nork daki ez ote diren

                Berrogoi baizik izanen.

Jainkoa

                Berrogoi balin baditut kausitzen

                Ez dut makurrik eginen.

Abraham

                Ene Jainkoa, ez otoi! kexa

                Naizen hauts eta errautsa

                Mintzaturik ere:

                Beharba hogoi ta hamar izanen dire.

Jainkoa

                Ez dut makurrik eginen

                Hogoi-ta-hamar balin baditut kausitzen.

Abraham

                Ausarta naiz bai, mintzatzea berritz ere:

                Beharba, hogoi izanen dire.

Jainkoa

                Ez dut hiria suntsituren

                Balin baditut hogoi kausitzen.

Abraham

                Ene Jainkoa, ez, otoi! kexa.

                Naizen hauts eta errautsa

                Azken aldiko

                Naiz mintzatuko:

                Beharba... hamar izanen dire.

Jainkoa

                Ez dut suntsituren

                Balin baditut hamar ere

                Kausitzen.

© Xabier Iratzeder