Burdina berdina

Eta hi haugu garratza zeru azpian,

deihadarka hatorren indar urria,

populuaren boza, odol gorria,

pil pil hago deiaren adar guztian.

Garrasitik sortu den burdin harria

moldakaitz da biguntzen suntsitu gabe.

Arroka bat bezala geure zutabe

hartu haugu arriskuz. Beldurgarria!

Ez zaik falta herrian ikatz ta labe,

ezarririkan sutan berehalaxe.

Zorigaiztoz beharrik biztu dirade.

Tximinitikan gora etxerik etxe

sorginaren antzera desagertzen haiz,

frakagorria dantzan doan legetxe.

© Alfonso Irigoien