Bere harrian

Anbototikan sutan datorren dama

loturik da gelditu Euskal Herrian,

sorginezko mugida badu gerrian,

adats urrezkoz dago lilurazko ama,

erretzen ez den sua, osagarrian

dirauen gar bizia, inkisizioz

desegin ez den kea, inon bizioz

eroriko ez dena, bere harrian.

Zahar dugun gogoa intuizioz

dadukagula zutik mundua deino,

bete gaitzan betiko geure azioz.

Ez dateke gurean bizia baino,

zuzi argiz biztua bizi bizirik,

iraganik bizitik gureganaino.

© Alfonso Irigoien