Itxura berriz

Ihauteri ederrak gertatu dira

Markinaldean berriz neguko umorez

ta berrogei urteko neke dolorez

garizuma luzea ezin azpira.

Algara eta barre jantzi kolorez,

hauteskundeak gero gudu iturri,

Gernikako bideak zeharo urri

ta hobiak oraino koroa lorez.

Irrintzika nahi dut hasi bihurri

etorkizun zuzena lortu beharrez,

pailasoen itxuran harturik neurri.

Urratua den boza bere indarrez

heda bedi munduan apurka apurka,

berbizturik dagoen bero ta garrez.

© Alfonso Irigoien