IV. URETAN HERIOTZA
Phlebas Feniziarrak, duela hamabost egun hil zenak,
Ahantzi egin zuen kaioen oihua, eta itsaso sakonaren hantura
Eta irabazia eta galera.
Itsaspeko korronte batek
Zurrumurrutan bildu zituen bere hezurrak.
Altzatuz eta eroriz
Zeharkatu zituen bere gaztaroko eta zahartzaroko epeak
Itsas arranpan sartzean.
Jentil edo Judu
Oh zu lema gurpila biratu eta haizalderantza begira zaudena,
Har ezazu haintzat Phlebas, behiala zu bezain ederra eta altua izan zena.
© T.S. Eliot
© itzulpenarena: Joseba Sarrionandia