Edurra'ri

        Betor garayan garaikoa ta

        Artu bei niri agurra,

        Naiz ta ekarri datorren orrek

        Mamin artean azurra;

        Udan eguzki kizkalgarria

        Eta neguan edurra.

        Aretxak bere, bere garayan

        Eduki daroa ezkurra.

        Agur O! edur zuri!, ederra.

        Maitegarrien zerduna.

        Zoratu ala konkortu ala

        Zer da egiten dozuna?

        Alatz andi bat dirudizu ta

        Zurt izten dozu laguna.

        Zure zuria, zure garbia,

        Zure otza ta biguna!

        O! edurraren zoragarria

        Edurra yausten danean,

        Sorginderatxu zuri-zuriak

        Egaz dabiltzan antzean!

        Edurtzaledun sorgintxuren bat

        Sartzen dauskuzu aldean

        Maitetuko mozkorti batek

        Ardoa daben bestean

        Eta edurrak zabaldu dauskun

        Izara zuri ederrak

        Edertasunik ederrena ta

        Maitagarrien eskerrak;

        Ederra baizen ona bagendu...

        Baña bere otz ankerrak

        Negu onetan gosez ta gaitzez

        Il bear ditu basterrak.

        Mendiak bera dator elurra

        Abazuzitzar andia,

        Iruntzi nairik bere azpian

        Artuten daben guztia;

        Gizon, abere, ardi ta pizti.

        Baita egazti zolia

        Edur ederra, dan guztia da

        Otza ta gose gorria

        Ainbat negar ta gaitz dakazaken

        Ezkero zure aldetik,

        Erbia bera baino pozago

        Artuarren guk geuretik,

        Yoan adi ba edur ederra

        Etorri azan bidetik,

        Yoan adi ba zati bateko

        Nire begien aurretik.

© Balendin Enbeita