Don Juanen olerkiak

 

        Euskaldunak zatozte ba gaur

        Sarako zelai aldera

        hartu txapela eskuan eta

        jatsi belaunak lurrera

        eta pozaren pozez pozarren

        begiraturik ortzera

        didar: Axular, Axular, zatoz!

        jai hontan geure artera

 

        Horra hor laino zuri eder bat

        agertutzen dan ortzean

        eta mendian zehar hor dator

        Axular dakar gainean

        Axularrek eskutik atso

        zahartxu bat eri antzean

        ama semeak dirudiela

        eritegira bidean

 

        Agur Axular herritar zintzo

        eta mintzale onena

        agur Axular hala behar ta

        herriko seme maitena

        agur Axular Euskal idazle

        bikainenetan irtena

        Axular zure Geroko Gero

        betiko beti aurrena

 

        Zeu eta zeure Geroko Gero

        Euskararen oin sendoa

        erosoaren erosoz

        zure mintzaeraren gozoa

        eztian legez gozoan gozoz

        gozatutzen dun gogoa

        baina xular lagun hoi nor dan

        beronek erran dijoa

 

        Ene semea ni naiz zure ta

        Euskaldunaren Euskara

        eta zuekin Euskal egunak

        ospatzen nator Sarara

        umeak aski berrikin berri

        atsegintsu jai hontara

        Hala ez naute sarturen inoiz

        heriotzaren lezara

 

        Nire bularrak iturritxo bi

        beti beti txirtxi baten

        uda ta negu gau eta egun

        Euskaldunari ematen

        baina neronen seme alaba

        batzuk dakustaz joaten

        amaz ahaiztuta erdal amean

        ugatzetatik edaten

 

        Ilea zuri aurpegia tximur...

        ... hau benetan da itzala

        Ugatzak ikol, sabela sakon

        hau da belaimen makala

        ene gaixoa, neure burua

        oinari adi dodala

        baina gogoa oso pozarren

        Axular zala ta dala

 

        Horra gaur nire buruko baratz

        honetan egin dan lana

        lorarik lora lorategian

        aratuarren dan dana

        ondo ageri dago nik txorta

        hoberik ezin dodana

        eutsi ba berau bihotz bihotzez

        ene Axular laztana

 

        Itxartu da Bizkaia

        lehor ta itxaso

        huri eta baserri

        haran, mendi, baso

        aberats eta txiro

        ume ta guraso

        Sabinen ujujuak

        itxartu eraso

 

        Aupa gagoz Bizkaian

        eta Gipuzkoan

        aupa dagoz Araban

        eta Naparroan

        aupa Laburdin eta

        aupa Zuberoan

        Euskadiren mugarra

        ez dau Bidasoan

 

        Itxartuta jagirik

        gaur gure zantzora

        agindu nahi dozuna

        eta edonora

        su ta gar, hil nahiz bizi

        lagi zaharrak gora

        gora Euskadi gora

        edo geu zulora

 

        Itxartu Euskotarra

        aupa eta jagi

        eta bustarri honi

        ediak ebagi

        Euskadi Euskotartu

        ekandu ta lagi

        lan honetan anaiak

        ez ibili nagi

 

 

 

© Balendin Enbeita

 


www.elkarlanean.com
www.susa-literatura.eus