Agerraldia: ATARIKOA
1A Emakumeek «Emakumeen gunea» izango dena hautatzen dute eta zakuetan daramatzen guztiak ateratzen dituzte lurrera, kanpamendu moduko bat osatuz: eltzeak, azeri disekatuak, bele edo hontz bat, ispiluak, sokak, erratzak, sareak...
1 EMAKUMEA Lemixi, lemixikua! (Banderak aztertuz). Zein kolore behar da gauzak hasteko orduan?
2 EMAKUMEA Edozeinek balio du. Hartu berdea, edo urdina, nahiago baduzu.
3 EMAKUMEA Biak hartuko ditut, berdea mendiko belarrarena, eta urdina itsasoarena.
4 EMAKUMEA Nik ere beste bi hartuko ditut.
5 EMAKUMEA Nik horia ere bai, badaezpada. Eguzki beroarena. Ez dago sekula jakiterik eta.
6 EMAKUMEA Banderak airean!
7 EMAKUMEA Airean banderak! (eta bandera guztiak dantzatzen dituzte airen).
Emakumeek banderak dituzte eskuetan. Saioan zehar behin eta berriz erabiliko dituzte, esaten dutenari laguntzen bezala, aidean mugituz. Hautatutako kolorea, kontatu beharrekoaren araberakoa izango da: borroka eta odola bada, gorria; heriotza bada, beltza... eta horrela.
1 EMAKUMEA Neuk ikusia dut begitxo hauekin.
2 EMAKUMEA Eta nolakoa da?
3 EMAKUMEA Haur eder ederra.
4 EMAKUMEA Ez dauka orduan aitaren antzik.
5 EMAKUMEA Ama Ximenarenak ekarriko ditu urak.
1 EMAKUMEA Zerbait du, hala ere, begietan.
6 EMAKUMEA Zerbait?
1 EMAKUMEA Bai, zerbaiten seinale nabari-nabaria.
7 EMAKUMEA Zeren seinalea?
1 EMAKUMEA Ez nuke jakingo esaten. Ezkutuko zerbait, nolanahi ere.
2 EMAKUMEA (Publikoari, banderak eskutan, anpuloski) Entzun duzue, Abarka eta Urraka errege-erreginen biloba jaio berriak...
3 EMAKUMEA Gartzia Dardartia eta Ximena Andrearen semetxoak...
4 EMAKUMEA ...Iruñeko erregetarako jaioak...
1 EMAKUMEA Bai! Zerbait dauka begietan.
5 eta 6 EMAKUMEAK Seinalea! Seinalea!
7,1,2 eta 3 EMAKUMEAK Gorde gaitzala zeruak!
4,5 eta 6 EMAKUMEAK Gorde gaitzala lurrak!
EMAKUME GUZTIAK Gorde gaitzala itsasoak! (eta bandera urdinak aideratzen dituzte)
1B Emakumeek naturaren elementuak menperatzen dituzte (nolabait). Denbora eta espazio ezberdinetan agertzeko gaitasuna dute. Natura, memoria eta adimena ordezkatzen dituzte. Euren traste zaharren inguruan dabiltza, betiere. Itsasoari egiten diote dei, honek OROIMENAZ hitz egin dezan. Kantu bat entzuten da itsasoko zaratarekin batera. Denboraren gurpilari eta memoriaren gorde beharrari buruzko koreografia da:
ITSASOAREN KRESALA: OROIMENA
UHIN BATEK DAKAR
HURRENGOAREN APARRA
AMAGANDIK ZARELA SORTU
SEINALE ETA GUZTI.
ERREGEEN ARBOLAK
ZUGAN DU EZPALA.
GAUR GARA HONAINO IRITSI.
IZAN ZINETELAKO GARA
GARELAKO IZANGO DIRA.
GATZIK EZ DUEN ITSASOA
DA AHAZTURA
AI OROIMENIK GABEKO
HERRIAREN GEROA!
1C Emakumeek hitz egiten diete euren lekuetan eserita dauden ikusleei, banderak tarteka harrotuz.
1 EMAKUMEA Eta zuek?
2 EMAKUMEA Nortzuk zarete zuek?
3 EMAKUMEA Zer egiten duzue hemen?
4 EMAKUMEA Zertara zarete etorriak?
5 EMAKUMEA Zer jakin nahi duzue?
6 EMAKUMEA Eta gu? Nor gara gu?
7 EMAKUMEA Bai, zer egiten dugu hemen?
1 EMAKUMEA Ixo, ixo!
2 EMAKUMEA Agian itsasoaren oldarrak du erantzuna.
3 EMAKUMEA Bai, itsasoak jakingo du.
4,5,6 eta 7 EMAKUMEAK Bai, itsasoak!
© Hasier Etxeberria