Baduk hor beti fede bat
1
Sineste sendoenen xorrotxean,
Liberazione osoenen bihotzean,
Duda-muda luzeenen haraindian,
Obra ausartenen iturburuan.
2
Baduk (n) hor beti fede bat,
Bahoalarik zimenduetaraino,
Badarraikalarik gauaren bururaino,
Maite dukalarik ezinbesteraino,
Erabaki dukalarik bizia emaiteraino.
3
Baduk (n) hor beti fede bat,
Bihotzarekin ikusten dakitenen baitan,
Kontzientzia jostagailu hartzen ez dutenetan,
Beren arimari ohartuak direnetan,
Beldurra gatik askatasunaren alde jokatzen dutenetan.
4
Baduk (n) hor beti fede bat,
Herri kementsuen atzetik ta aurreran,
Iraultza zuzenen urratsean,
Elgarrekilako asmu handien abiaduran,
Gizonarentzat eraikitako gizarteetan.
5
Baduk (n) hor beti fede bat,
Herri ta ustekeriak garaitzean maitasunak,
Herioari nausi dela bizia sinestean bihotzak,
Nahigabeak gainditzean itxaropenak
Egiazko gizon sendo, libro, ta zuzena haizenean hihaur.
6
Baduk (n) hor beti fede bat,
Ezin hautsizko lokarrien lotzeko;
Eginahal berrien bideak zabaltzeko,
Edozoin mugaren artetik iragaiteko,
Gizonaren helburu bururaino heltzeko,
Heure neurria neurtu ondoan ez etsitzeko,
Berpitzearen mentura ez galtzeko.
7
Zoin duk (n) bada hirea?
Ba ote dik (n) izenik, begitarterik, historiarik?
Egin ote dik (n) hire lurrean errorik?
Ba ote dakik (n) haren aitortzen, kantatzen, erdizkatzen?
Hire'gogo-bihotzak, hire bizia hark ote derabiltza?
8
Nik...
Galileako herritar apal haren ganat itzuliz
Di(n)at beti ukan, ikertu, gorde, aurkitu heurea.
Neure izaitearen barren-zolan ta goi-ertzean Hura ziagok(n)
Nihaur berpizten nauen sugar zoro bat bezala.