Zorion-bila
Azken primetan
1
Bazter orotan aditzen dire Eskual-Herriko nigarrak
Bizitzekorik ez duelakotz emaiten hemengo lurrak
Gazte guziak urrun doatzi penetan utziz xaharrak
Nola ditazke bade kontsola gure herritar suharrak
Girixtinoki hazi ondoan galtzen tuzte beren haurrak.
2
Orai artean bizi izan da bere lurrekin gaztia
Jainko Jaunari eskainiz hole borondate izerdia
Nahi baitzuen noizbait obratu munduko amets eztia
Urustasuna zuen xekatzen eginikan familia
Zorion hori ikusi gabe joan zako tenoria.
3
Inoxentziaz beteak dire orai ainitzen bihotzak
Iduri-eta hirian diren neguan ere arrosak
Bazterretikan entzunak ditut arrazoin batzu bortitzak
Nola penarik baizik ez duen emaiteko laborantzak
Sineste horrek igortzen ditu urrun Eskualdun nexkatxak.
4
Kasu heu segur ez da izanen mundu huntako lehena
Bainan halere pena haundi dut ezen baita Eskualduna
Mutil galante ezagutzen dut, badu ere ontasuna
Sekulan horrek ez du izanen espos baten atsegina
Eta jadanik Karen etxeko geroa da iregana.
5
Gure sor-leku maite maitea mende huntan hola dago
Trixtura dorpe horiekilan laster laiteke akabo
Zeruko Aitak agian guri ez daoku emanen habo
Zonbat ezkongaiikusten dugu beren lanetaz esklabo
Mutxurdin guti eta zendako bade hoinbertze donado?
6
Erresumako buruzagiek badute lege berria
Beren iduriz lagundu nahi baitute laboraria
Elgarretarat lurren biltzea hemen-e zaiku jarria
Behar ginuke orai xekatu denen lantzeko jendia
Lur hori segur hor egonen da ez baitu maite hiria.
7
Eskual-Herria begiratzea hor denendako pondua
Ezen bertzela jasanen tugu guziek hutsen kondua
Laboraria azkar dadila erainez ogi-artoa
Aments berean sartua dugu Eskualdun gisa gogoa
Lot gaiten orai denak lanari donado ta ezkondua.
8
Gogoan atxik, lagun maiteak, Jainkoaren parabola
Deustako ez da izaiten ahal fruitu gabeko arbola
Lur hori gabe ez ginintazke bizi ahalko nihola
Uzkurkeria baztertuz egun segi lana hola-hola
Beti garbirik atxikitzekotz gure aitamen odola.
9
Bihotz barnetan ukan dezagun zorion eta bakia
Denek batean fede azkarrez egin dezogun galdia.
Zeru-zolan den Ama maiteak emanen dauku grazia
Hura baitago gure bizia geroaren iturria
Haren nahiak salbatuko du lurra ta Eskual-Herria.
10
Kontsolamendu bila zazue adixkide lagun onak
Badaki segur berak zer egin mundu zabalaren Amak
Eskain ditzagun dudarik gabe gure penak eta lanak
Airos ditela gogo-bihotzak flako eta ahulenak
Zeruetako deituak dire laborari Eskualdunak.