Ezkondu gabe alargunduaren kantua
Artzaina, C.
1
Ur-handian bi ahate, buru beltx, hegal-xuri,
Igerika zoin pollitak hurbil-hurbil elgarri...
Ibaiaren bi aldetan bi etxe teila gorri,
Zurea eta enea, irriz iguzkiari,
Leiho-begiz amultsuki elgarri so iduri.
2
Hamabortz urtetan jada nintzaitzun hitzemana;
Zorigaitzez itzali zen zure arreba zena.
Zoin luze dolu-denbora, hiru urte, mendena!
Uste nuen sekulakotz nuela ene pena!
Bainan etsipenak ere badu bere azkena.
3
Elizatik ezkon-deiak eginak izan ziren;
Ezteietako eguna hautatua ginuen;
Ene arropa xuria nihaurk josia nuen;
Erheztun eta petentak entseiatzen nituen,
Eia zure ohoretan ninduten ederturen!
4
Eta horra gaur goizeko amets izigarria,
Herioak zituela kolpez hartu-berria:
Beude erheztun-petentak, bota zilharreria!
Bego arropa ederra, bego belo xuria!
Ai, ei, hori othe dut nik prestu egon saria.
5
Ilea mototu-eta, huna ni ur-untzian,
Ibaia iragaiten dut; sartzen zure etxean;
Jadanik hil-kutxan zaude bi kadiren gainean;
Nigarra nasai jauzten zait kutxa perekatzean!
Eguna ilhun egin zait, gaua dut bihotzean.
6
Zure aitamen ordari, ihardokiz penari,
Lotzen naiz erreina gisa sukaldeko lanari:
Berek badute aski lan jarraikiz othoitzari...
Zure ganberan izan naiz, zure ohean jarri,
Komeni zaion bezala zure alargunari!
7
Ur-handian bi ahate buru beltx, hegal-xuri.
Arra goiz-ihintzarekin eman da ihesari;
Emea arats-lantxurdan eman da ikarari...
Ibaia aintzina doa bere sail luzeari!
Ahatea, hor, bakarrik, nigar-auhenez ari.