Bidarraiko artzainaren kantiak
Artzain Xaharra
1
Mila zortzi ehun ta hogoi ta zortzia
Hazilain hogoitiru mundurat jitia
Noizko duket nik bertze mundurat joaitia
Plazer dukezunian zuk Jainko maitia.
2
Jainkoak aitameri in zuen grazia
Mundurat emaitia ni lehen fruitia
Arto-t-esnean izan niz ontsa hazia
Kolore zuri gorri ta beti propia.
3
Sei arreba ta hiru anai aitamekin
Hiru aldiz zeruan han aingeruekin
Ni mendian ardizain eskalapoinekin
Gaua lastoan zorri ta kukusoekin.
4
Ama birjina lagun arrosorioekin
Debozione eginez errespeturekin
Pelorekin kamantzan, biak elgarrekin
Goizetan jausten ginen ardi-esnearekin.
5
Gure etxola borta-leihorik gabia
Bainan beti ginuen osoki garbia
Arraxina argitzat, oi gure loria,
Hura erre ondoan ikusten debria.
6
Ikusten zelarikan haize ta galerna
Serioski otoizten ginuen Ama ona
Euri ala gau egin behar ardi-lana
Orduan penatzen da mendian artzaina.