Miruba, saguba, zakurra eta otsoa. (Ipuia)
Artola, Ramon
Mirubak zeramala
gazta bat, zezan jan,
erori ta zitzaion
erriochora joan;
eta urak indarra
nola baitzeraman,
bueltaka zion zenbait
bidean eraman.
Sagubak ikusirik
urtan gazta ala,
zakur zar bati deitu
zion beriala;
esanaz, aren gazta
urak zeramala,
eta arren ta arren
atera zezala.
Ateratzen bazuben
bere lanagatik,
irutik bat emango
ziola gaztatik;
eta zakurrak pozez
saltarik bertatik,
gaita guriya zion
atera urtatik.
Baņan miruba ere
jachi baitzan bera,
gazta ura arena
zala esatera;
eta abiyaturik
ezda eta bada,
sagu mirubak zuten
naspilla bat para.
Ezin konponduz ziran
joan otsoagana,
onek zuzen zeikien
zerabilten lana;
eta ondo aiturik
kontu pasa zana,
esan zien: da gazta
zuzenduko dana.
Jankaia iru puska
segiran egiņik,
esan zion zakur zar
ari otsegiņik:
urtatik dekalako
gazta atera ik,
irutatik bat to, ta
joan ari emendik.
Zakurra zan denboran
puska arekin joan,
otsoak beste biyak
berak zituben jan;
eta jabeak nola
begira zeuzkan an,
biyari zizkan papur
sobratubak eman.
Esanaz kobraturik
nik neronen lana,
au da emen zuentzat
sobratutzen dana;
eta partizioaz
kontentu ezdana,
keja dedilla beste
otso batengana.
...............
Nola kejatuko da
indarrik gabea,
jan lezakena bada
indarren jabea;
beragatikan batek
jo ezdezan bea,
ez okerreratzen
du askoz obea.
|