Ubako elizachoan, on Domingo Agirre jaunari
Artola, Jose
Birjiña Ama, emen zaudena
aldariaren aurrian,
aingeruchoak zure kontuan
dituzula chit urrian;
lagun zadazu mundu ontako
nere bizi laburrian,
biyotzetikan eskatzen dizut
belaunkaturik lurrian.
Zerutik ziñan mundura jachi
pekatariyarengana,
ta aldaretik deitzen diguzu
alderatzeko zugana;
ezagutzen det zer ongillea
zeran guretzako ¡Ama!
orrengatikan aldera nator
eskeintzera nere izana.
Mancharik gabe izandu zera
menderaturik subia,
erakutsiya laja zenduben
guk bear degun bidia;
aldaretikan erakutsitzen
diguzu orain legia,
esanaz: Beti maitatutzeko
miragarrizko fedia.
Zenbat mirari egin dituzun
mundu ontan orain ta len,
guzti guztiyak dauzkagu ondo
gordiak gure barrenen;
eskatzen dizut ¡Ama maitea!
iltzen naizenian emen
zeruan zure mantupe ortan
ar nazazula lenbailen.
Bitarte ontan eman gaitzazu
betiko zure graziya,
gorde dezagun fede santua
len guri erakutsiya;
labur-laburra izan dediyen
mundu engañagarriya,
gero irichi zagun betiko
zeruetako gloriya.