Milla betiko-loraz egiñiko aroa Kalderon ezillkorrari
Arrese Beitia, Felipe
¿Nun da niretzat lira gozo bat?
¿Nun miñ bat leun ta zolia?
¡Ai baletorkit nundibaitetik
Musaren baten argia!
Neurez ez daukat idurimenik,
Laburra dot etorria,
Goratuteko gizon andi bat,
¿Ausaz naz biursaria?
Erdue musak lagundutera,
¿Nun zagoze irudiak?
An ete zaren jasoten dodaz
Zeruruntz neure begiak:
Nun ikusirik ainbeste izar
Ziargiz chito josiak ,
Errañu batek zabaldu deustaz
Adimentuko begiak.
Egiaz areek argiak dira
Zeru zabal urdiñean;
Jakitun onak iñoz illunak
Ez dira gure artean
Noz arteraño iraungo daben
Izarrak argi gaiñean,
Ez dakit; baña bai gizon batek
Zeruan eta lurrean.
Gizaldicho bi uts aiña jakoz
Sekulakoa danari,
Beeko bizitz au ames bat baño
Ez jakon bati irudi
Orresegaitik, ¡O Kalderon! gaur
Zachataz alabagarri,
Zeru goyetan zagozalako,
Argi egiñaz lur oni.
Izarcho batek ez dau ichiten
Gaba danean ederra,
Errañucho bat bialdu baga
Ezpada bere lurrera:
Zureak gau ta egun dakustaz
Zabalik mundu guztira,
Zeruruntz barriz niro begiek
Eltzen ez diran tokira.
Urregorrizko luma eder bat
Eskuan dozu saritzat,
Bear andiak zenduzalako
Egiñda ichi guretzat;
Eskribu orreen artean ondo
Gogoan sarturik daukat,
Berba neurtuan, onen antzera
Jarri zenduan egi bat.
Amesa dala eukia, eta
Amesa bere ezeukia,
Amesa astea geituaz eta
Gurariz nekatutea,
Amesa iñor iraindutea,
Amesa mundu guztia,
Chikia onik audiena ta
Amesa bizi izatea.
Irakurrita au eziñ ukatu
Neizun daukadan aroa
Milla betiko lora ederrez
Zuretzako atondua:
Jantziko deutsut beronegaz gaur,
Orren duiñ dozun burua,
Zuri begira, arritu dedin
Mundu bat oso osoa.
¿Noz gertatu da beste ainbeste
Gaztelar biursaria
Mundu guztian agertutea
Euskaldun loraz jantzia?
Ez dakit, au dan gizonen lana,
Ez dakit, dan miraria,
Ez dakit ezer; baña badakit
Kalderon dala andia.
¡O españatar, biursarien
Artean gorenengoa!
Zu alabetan gaur euskaldun bat
Oso dago zoratua;
Gizon illkor bat nazan legeche,
¡Ai banintza aingerua!
Kantau daizudan omen eder au,
Zurturik lurraz zerua.
Gloria bada zuri bietan
¡Eskribitzalla argia!
Gloria goyan, gloria beean,
Kalderon miragarria:
Gizaldi bitan izan bazara
Zeru lurretan andia,
Eunki danetan izango zara
Gure gomutagarria.