Kaliforniako artzaina

Ardans, Arnaud

 1

 Aire chaharño batean orai

 hemen hasten naiz kantatzen:

 Ameriketan nola bizia

 dudan airoski pasatzen.

 Orai bi urthe leku hotara

 gogotik ethorri nintzen

 Luzarat ere ene chedea

 ez zaut batere aldatzen,

 Naizelarikan sor-leku hortaz

 frango ardura orhoitzen.

 2

 Artalde churi baten zain nago

 jinez geroz sor-herritik:

 Lan pollita da gaztearentzat

 hunara helduz eroztik.

 Lagunak ere aski adura

 ikusten ditut hurbildik

 Horren gainean ere ez daukat

 deusikan erraitekorik:

 Munduan nehork ez du nik bezain

 lo, jan, edan gostukorik.

 3

 Ardi haz-leku pollit batean

 hemen gostura naiz bizi,

 Ordu berean dudalarikan

 bizitzen ere ikasi.

 Hunat jiteko, gazte maiteak,

 othoi etziztela izi:

 Leku ederrak baditugula

 nik erranik jakin zazi:

 Itzuli baten hunat eitea

 gazten hezteko nagusi...

 4

 Artzain sartzean dena sosegu

 ekarri nuen gogoa:

 Ez zaut ttipitu bihotz-barnean

 oraino bozkarioa,

 Lanen artetik ahoa kantuz

 ez bainitaike enhoa.

 Iduritzen zaut, izanik ere

 jakitate ttipikoa,

 Hemendik gero ta maiteago

 zaitudala, Sor-lekua!

 5

 Bortzgarren bertsu chume hunekin

 akabatzen dut oraiko,

 Gaizki erranik ezarri banu,

 zuek eni barkatzeko.

 Sor-leku maite eta gochoaz

 bethi nuzu orhoituko:

 Hor utzi tudan gazte lagunak

 gogoan ditut bethiko.

 Urrunetikan goraintzi dener

 eta ikusi artino.