Gaua begiratzen

Amaia Iturbide

                 I

 Kristalezko ontzia

 malko anonimoz egina

 kulunka doa

 isladetan datzan ilargi gidariaren

 konsolamendu bakarrari amore emanik

 zeru lebearen kubritxeta berjosiz gero

 enarak laztantzen nakarraren esmeroaz

 ausentzia punituak palazioko hormetan

                 II

 Ilargia

 agian

 itxaroten dakitenen

 kabiarik soilena

                 III

 Estraineko argi urratzeaz

 jaioak izan zirelako

 ur-jelan paradisoaren proiektoa

 behialatik eta obsesiboki idazten ari

 milloika izarretako bakoitzaren

 bost behatzen

 tantak

 lodiak,

 esnezkoak

 espazio-denpora infinitoetan

 tanta

 minuskulo bezain esenziala

                 IV

 Gaua, beztidura birjinaletan estalia

 enigma deszifragaitzen sinboloa da,

 harribitxien miraila urrunetan galtzen den berbera

 gaua, bigarren beila,

 sekretuaren bideak prestatzen

 zutabe hondatuetan etorkizunaren irakurketan

 bilatzen

 arratseko errautsen bestekaldean