Bitina bat arratsaldean

Aresti, G.

 Ortuetako abere artean,

 bat dago guztiz ederra.

 Dotorezian dirudiena,

 mahats arteko eperra.

 Baldin itxuraz ederra bada,

 usainez berriz okerra.

 Eguerdiko bero pisutik,

 pasata gero aberea.

 Gorri bizitik zuri minera,

 ezagutu ta morea.

 Modu tristean aldatzen zaio,

 erruz bere kolorea.

 Azken orduko bitina motza,

 ederra zinen goizean.

 Kiratsa zeunkan ema-sabelak,

 jaurtiki zinduenean.

 Urrin bigunez ito zintezen,

 alperrik arratsaldean.