inprimatu
Azken zatia
Izenburua:
Azken zatia
Sinadura:
Luis Mari Mujika
Urkizaren iruzkina:
Egilea(k):
Mujika, Luis Mari

Argitalpena:
Egan.
Urtea:
1980
Argitalpenaren urtea:
Alea:
1/6
Orrialdea:
71-75

 

 

 

 

faksimilea ikusteko


faksimilea ikusteko


faksimilea ikusteko


Askatasunaren hildoan

 

Mujika, Luis Mari

 

 Etorri zen haize freskoa

 oihartzun berritan oretua,

 etorri zen geroaren hatsa

 zuhaitz gaztetan igurtzia,

 etorri zen eguratsa

 promes berritan pilotua,

 bidetatik, hildotatik

 heroek goraka zegiten,

 galtzada nabar-harrizkoan

 zaldi askatzailea

 arrapaladan zetorren,

 uhinetan txirla umilak

 askatasuna zekarren,

 kresalaren gatza

 abesti gozoz nahastu zen,

 esperantzaren soin luzea

 izarretaraino igo zen,

 hauts nekatuen etsipena

 esperma basati gertatu zen,

 gauaren susmo ilunbera

 egunabarrez gaztetu zen,

 otsoak kolpatutako ilargia

 eguerdiko eguzki itzuli zen,

 zigorraren monotonia

 gure iraultzan irentsi zen,

 ene herriak askatasuna, aih, aih,

 hurbiltzen sentitu zuen...

 

 Eneko Aritza-ren belaunek

 etzuten lurra ezagutzen,

 Eneko-ren uhel-abarkak

 etsaien zilbor-kordez,

 euskaldunaren pazientziak

 zeroan adierazpen,

 eremuen nagi horiak

 etsipena ez onartzen,

 zigorpean hauts latzak

 basurdeen bultzapen,

 euskararen kalenturaz,

 ai, etsaiak beldurtzen,

 Andia-n eta Urbasa-n arrano beltzak

 hegada harro egiten...

 

 Zumalakarregi-ren zangopean

 liberala makurtu zen,

 euskal soro berdeen mentura

 gorriz jantzi zen,

 etsaiaren promes zuriak

 guretzat birao ozen,

 "bultzapen= orpo etzana

 bailitza limoi ustel,

 behin, herriak libre izateko

 asmo gaitza hartu zuen,

 mailupean euskal lepoa

 burdin hotz gertatu zen...

 

 Santa Krutz-ek errezoa

 zigorte egin zuen,

 herra, agonia, garrotoa

 otoitzaren estalpez,

 izu zaharra ausardiaz

 mendian ezkontzen,

 fagoetan,

 haritzetan,

 gaztainetan

 sotanaren itzala

 askatasun promesa zen,

 madarikazioaren madarikazioak

 asmo txit goren,

 ah, basurdea makurtzeko

 basoan etsairik etzen...

 

 Abando-ko txapel harroa

 tente da jarri,

 Arana-ren eskabideak

 protesta larri,

 herriak herri jarraitzeko

 asmoa nagusi,

 ikurrinaren maindirean biltzen

 euskaldunen setakeri.

 Nahiz-eta etsaiak Euskal Herria

 uztarritan jarri,

 nahiz-eta otsoak hortzez

 gure hariak etenarazi,

 nahiz-eta azeriak gezurrez

 gure oinak itsasi,

 euskaldunaren semeak

 eginen du irrintzi,

 gure beso eta bularrak

 metalen bortxakeri,

 borrokan dabiltz hortik

 Etxebarrieta eta Txiki

 (ah, argia, erasoa, harria,

 burdina, amorroa ta suharri),

 zaldiaren zangopean

 hondarra errukarri,

 alferrik dabiltz odol gaitzak

 zapaltzen gure herri,

 alferrik gatz suminduak

 ernegatzen gure asti,

 idiaren lepo makurra

 zezen baita itzali,

 ingudearen bizkarrak

 mailua baitu jaitsiazi.

 

 Ez, ez, dagoeneko

 hesiak ez dira hesi,

 kateak ez dira kate,

 lokarriak ez lokarri,

 euskal suharriak, karaitzak, mugerrak

 erreboltaren gogorkeriz,

 AGIŅA-ko pizti etzana

 jarri da gaur zutik,

 ah, etsaiaren biriketan

 zenbat, zenbat izularri...!

 


inprimatu