Errimina
Aurraitz
EGAZTADA OKERRA
Ibili nintzan ibil,
zorionaren urbil,
baso ezeetaz, mutil,
eskuan leizar-makil.
Orlegien kadena
iluntzetan lilura.
Goizetan guztiz bakez
grina-indar eta lera.
Oro nitzat olerkoi:
Poz, atsekabe, goibel...
Aratzaren pozetaz
gaien iluna gibel.
Egutsaren bakean
biozkadak bidazti;
mendi-aize biguna
poz arrotzen abesti.
Egaztada okerrez
alde nintzan geuretik.
Ona zapuztu neban,
negarrez nago ordutik.
MOTEL
Berein burutasunek
naukie itun:
Zer dala-ta aberritik
alde ete nun!
Gorputza bero eta
gogoa otz;
tropikuko aroak
grinak zorrotz.
Urre-egarriz arrotzak
biotz-lizun.
Lurralde gaikoi ontan
pozak urrun.
Erri eta etxe-min
gogo-motel;
uste bako bideetaz
oinak tentel.
Lora barik zelaiak
oler-antzu.
Gogaien arantza ilun,
deskeilatsu.
"Oa aberrira" dinost
barnak, ozen,
"Ezin daikek, luzaro,
iarrui emen".
Aberria istea, bai
zorakeri!
Neurtitzok bediz besteen
erregarri.
OLDOZTEN
Zer dala-ta alde neban
geure aberritik,
etxeko ta adiskideek
negarrez itxirik?!
Gal neban goiz garbien
pozezko bizitza!
Eta iluntze kadenen
olerki egoitza!
Soin beroan otz-otzik
daukat, ba, gogoa;
gomutak atsekabe
barnaren giroa.
Ixilik inguruak
ots bako ixilean;
malkoek askatasun
ezi goibelean.
Zer dala-ta, baina, alde
neban geureekandik,
ta gogoa erauzi
pozezko larretik!?
ERRIMINA
Dei ta dei daukat Aberria,
dei sarkorrez, egun eta gau.
Ezin daiket atsekabe au
jasan: neke iat atzerria.
Geureekandik asau ta goibel
luzaroan ezin naiteke.
Gomutapen garbiak naukee
galdu-pozkidan gogo-motel.
Euskal-mendien oiartzunak
ulu daragizte tamalen
zaurian, ta arantza zorrotzen
ikutuz malkoak biotzak.
Gomuten zidorrak biziro
ioataz irudimena aize.
Dana arrotza barruan eze,
aantzigaitz iataz geureen oro.
Geure gurasoak datzazan
lurraren bake orlegia!
Zugandik landa atsekabia
ugari toki guztietan,
ARTEGA
Iluntzea da!
Tropikuko iluntze sargoria.
Gogo minduaren ezaldia
durduxtu iata.
Amesak ernai,
Karibe-itsas-ertzera eldu naz,
erriminez ganezka barna: Arnas
garbiz ezo nai.
Ortzian zurbil
ilargi betearen zidarra.
Ugin-otsak urrunen didarra
dakast oroiz bil.
Amesa ba'litz
egia onen sorbatz goibela!
Itzarrik nago, baina, tamala
azazkatu naiz...
POZKIDA BARIK
Igande goiza!
Pozkidarik bako igandea!
Ez mezarako astirik, ez...
Oro lan utsa.
Au mingotsa da!
Aulan izatekotan ez dot
nai bizitza. Leen bait leen nai nik,
Euskalerri'ra
Gorroto baidot
diruzalekeria, "Ogi
utsez ez da bizi gizona..."
Gai utsa iguin dot.
BAKARTADEA
Tropiku'ko goiz gorria!
Ez daukak Euskalerri'ko goizen
garbi atsegingarria,
Ondartza-maurtuan nago,
tamalak itsas zabalez aske,
berein burutasun ego.
Bakartada itzela ingurun
ixil, eresi itunenak ioten,
itsasoren otsak lagun.
Munduaren azken-ertza
dirudi lurralde goibel onek
Osertza, ura ta ondartza...
Olerki arrotza sorbatz,
begiak ezko, oldozkun goibelak
doakidaz aberrirantz.
Eta urdinak so egiten
dodaz urrunen anotsak barne
entzumenean dei ozen.
ORO ARROTZA
Arrotza tokia.
Arrotzak lagunak.
Arrotza ortzia.
Arrotza lana be...
Arrotza guztia!
Gai arruntetzaz mintza
natxakee gaztelera
-italera naasteaz,
euskera bularrean
bultzaka.
Oneikaz ezin mintza
Alighieri'z, ez ta
Paganini'z be: Tolez
bakoa da ba euron
irrika.
Arrotza tokia.
Arrotzak lagunak.
Arrotza ortzia...
Au da bizikera il
ta negargarria!
Banbu-pean nago
bazkaritan,
lau italiar lagun
baranoan.
-Tamalak gizon ok-.
Bigun deutse,
elea erestsu,
ermina autu.
ABERRITIK LANDA
Aberritik landa
ez dago zorionik.
Ez eta pozezko
egun argi ta alairik.
Itxi nitun baso
ezeetaz gogoa uzu;
soina adore bage
xede igigarriz antzu.
Aberritik urrun
poza be atsekabe.
asan diruz baino
aberrian txiro obe.
Gogoak egon nai
ez daun tokian ez du
soinak toki onik:
Oba leen-bait aldendu.
Erbestean bizi
baino oba aberrian il,
gogoa gentzaz ta
norberetarrak urbil.
AU TAMALA!
Mozkortu egin gura dot;
mozkor-mozkor
Erri-min su uxatuteko
aalik bizkor.
Txiribogin! edaria;
gorri nai baltz.
Ta gogorra ba-da oba
saminontzat.
Boaz nigandik mingotsok,
eta betoz,
galdu nitun poztasunak
oldar osoz.
Ezin daiket aulan iraun,
beti goibel,
atsekabeen tontorrean
gogo-motel.
Kantau daidan neurekautan,
bertso ixilez
Malkoen eresi meiak
suntsi beitez.
Klinkada bat..., iru, lau, bost...
Au tamala!
Minak kentzekotan, geitu
edan-ala.
|