Algeriatik
1
Algerian elgarrekin
Nahi tugu bi hitz eman:
Nun ta nola bagabiltzan:
Behar dautzuegu erran;
Gure maite guzietarik
Kendurik gaude penetan;
Frantziaren zaintzea gatik
Hunat gaituzte ereman.
2
Hemen ikusten duguna
Guk ez ginuen sinesten:
Aintzinekoen errana
Ginauden hala othe zen!
Zombeit egun amets batian
Hola dira iragaiten;
Bainan bizi arrotzenari
Begia da arrunt jartzen.
3
Nun dira sorho pherdiak?
Nun mendiko ithurriak?
Oro idor eta hilik,
Daude biluzi gorriak:
Iguzkia samin dagola,
Dauzka oro kizkailiak:
Segur urrikaltzeko dira
Hor bizi diren jendiak!
4
Hemen garen soldadoak
Ez gaitezke arrangura;
Numbait urrun izan gatik,
Pausan bagotzi ardura.
Kaserna tzar batian baino
Zaluago doa denbora;
Killa laster jin dadiela,
Hori da gure desira.
5
Zorionez hemen dugu
Gu lauek elgar hatzeman:
Izan dugu plazer hori
Toki trichte galdu huntan;
Fagore bat ginuke nahi,
Jauna, hemengo denboran:
Eskualdunak beira gaitzatzu
Lanjer guzien artean.
6
Agur beraz ta goraitzi,
Gure aitama maiteak,
Anaia, arreba eta
Maite ditugun guziak;
Bihotzez hor izana gatik,
Luzaz gaude berechiak;
Esperantza fermu hau dugu
Zuen arterat itzultzia...