Oroimena

Basurko, Juan

 1

 Ondarribi-ko Jaizkibel mendi

 Zabal artan jaio nintzan,

 Nik ez nekien gazte denboran

 Erriko bizitza zer zan,

 Artzai txistu ta txori abesti

 Besterik entzuten etzan,

 Jai egunetan erritik gora

 Nor edo nor irixten zan,

 Gañerakuan jolasten nintzan

 Eliz-aurrean pillotan.

 2

 Zenbat alditan eraman nion

 Nere amari gobara,

 Itsas aldeko iturritxora

 Beko erreka txokora,

 Juaten nintzan txotxak biltzera

 "Guztiz-Eder"-ko oyanera,

 Gibel urdiñ, ta xixa gozoak

 Bildu izan ditut kolkora...

 Nere orduko ibillera aiek

 Etortzen zaizkit gogora.

 3

 Birian dator, iya iritxi da

 -Iraillaren zortziya,

 Ondarbi-tarrak, Erriko festak

 Egiteko berexiya,

 Egun orretan Guadalupera

 Juango da jende guziya,

 Zar, eta gazte, paketsu ta alai

 Naiz atera izerdiya,

 Ordu batzutan pozez beterik

 Ni jaio nintzan mendiya.

 4

 Goizeko intza gozoa artuaz

 Iges egiñaz Erritik,

 Ni're joango naiz, mendiyak gora

 Bide polit-txo batetik,

 Eliz-aurreko zumar maiteak

 Arren egon bitez zutik,

 Inguru artako lagun zar aiek

 Maite baititut gogotik,

 Nere burura ekartzen duten

 Oroimen gozuagatik.