Euskaldun zintzoen balada

Joanes Mirande

 ELGAR,Pariseko euskaldunen hilabetekarian agertu da duela urthe, hemen ondoan

 emaiten dugu J. Mirande-n poema. Hilabetekari delakoak, nahiz ez duen bertze

 batzuen pretenzione ta balentriarik, bethi lekhu zabal bat utzi deraue ideia

 berrieri. Arrautzetik jalgi berri diren euskaldun kaseta egile batzuek etsenplu

 har dezatela.

         Euskaldun zintzoen balada

         (Aldi berean Ortzi euskal jainkoari zuzendu galde othoitz bat dena,

 zintzo ez den batek eginik.)

                 Soin zabal, zalhu, txapeldun,

                 Euskaldun eta Fededun,

                 —Handi baita— sudur mintzo,

                 Zintzo dira, o! hain zintzo

                 Eta barnez oro zaldun...

                 ...Nahiz arrunt den azala

                 (Izaitetik hek bezala

                 Ortzi jaunak zaint'nazala.)

                 Ilhunpean zeuden lehen

                 Bainan JEL argia goihen,

                 Jautsi baita Euskadi-ra,

                 Argiturik bizi dira

                 Ahalikan eta zehen

                 Demokrat onen gisala.

                 (Argitzetik hek bezala

                 Ortzi jaunak zaint'nazala.)

                 Jakintza badute anhitz

                 Atso-, haur, eta zuhurt-hitz

                 Badakite politika,

                 Pilota, dantza, kantika

                 Bai eta kantu ez likits-;

                 Leitzen dakite Misala

                 (Leitzetik heiek bezala

                 Ortzi jaunak zaint'nazala.)

                 Trebe izaiki tekhnikan

                 Joritzen dira Amerikan;

                 Haatik, han ere zintzoki

                 Elkartzen dira Batzoki

                 Abertzaleetan; ez bakan

                 Joaiten, han ere, elizala.

                 (Joritzetik hek bezala

                 Ortzi jaunak zaint'nazala.)

                 Aphezak eta auzaphezak

                 Benedikatu ezkontzak

                 Egiten dituzte bethi

                 Onetik landa hobeti

                 Dastatzekotan -aratzak

                 Diren neskekin, ontsala.

                 (Ezkontzetik hek bezala

                 Ortzi jaunak zaint'nazala. )

                 Bainan ahanzten zitzaitan

                 Hospatzea neurthitzotan

                 Heien jaunzdura jathorra:

                 Ongi zuritu athorra

                 Dute jaunzten igandetan,

                 Bihotzaren zuriz ala?

                 (Zuritzetik hek bezala

                 Ortzi jaunak zaint'nazala.)

         IGORTE:

                 Nola juduen baitzinen

                 Zintzo diren Euskaldunen

                 Jaun zara, Jahve, gisala

                 Neu, zer ere zaitan jinen,

                 Zintzotzera hek bezala

                 Ortzi-k utzi ez nazala.

                                                                         1950ean