Gabonak (1984)

Luis Baraiazarra

             1

 Neguaren barnean

 haize hotzak xixtu...

 mezu onik dakarren

 gaur ezin sinistu;

 trumoi-hotsa nunahitik

 ekaitzen arrisku,

 baina Belenen zaigu

 ixarño bat biztu.

             2

 Jaio-berri pottolo

 kumatik irrika,

 ixarñoa jostari

 zerutik ñir-ñirka,

 Aingeru-aldra, berriz,

 poza aldarrika,

 kanpaitxoek dantzari

 bezate errepika.

             3

 Asto eta idia

 hortxe lokuluxka

 txit mantso eta mazal

 ondoan daduzka;

 begiz daude daztatzen

 zerutiko puska,

 Jainkoaren baratzak

 eman duen uzta.

             4

 Hor zaude maite-loan

 iñoxo ta guri

 zeruak eman digun

 esperantza xuri,

 Jainkoak jantzi duen

 ahultasun iduri;

 Haur polit hori,

 gugan bakea ixuri.

             5

 Izadiaren dantza,

 ametsen biztea,

 Olentzerok irrintziz

 dakar albistea.

 Zein pozgarri zaigun gaur

 Zure irixtea,

 zeru bihurtu baita

 lurralde trixtea.