Maite dot maite

Muniategi-tar Sabin

 Maite dot maite, zugaitz barrien Jorrailleko

 ezetasuna ta, Udazkenez negar dagin

 orri orizkatuen aizepeko zinkurin

 ituna, gero, banan-banan lurreratzeko...

 Maite dot maite, zugaitz eguzkituen dirdaia,

 Udaran, itzal-aterpe gozoa eskeintzen

 ta berein txoriren bizitzadun egarria,

 abesti samur ta ederrakaz aizeratzen.

 Maiteago dot oraindik suak kixkalitako

 egur garrazta zauritua, ain minberati,

 gelditu izan zana bai, aldi baterako.

 —Ez txori, ez aize, erreta ta, am mirabe,

 gelditu zana bide ertzean, errukarri,

 aztutako maitetasun zar bat bezelaxe.