Gurari utsa

Muniategi'tar Sabin

 Eskatuko neuke, eskatu,

         baña zetarako

         eskatu?

 Zenbatu, zenbatu:

 bat, bi, iru, lau...

 Bai, zenbatzu gauza nai!

 Mosu baten beroa

         eta, zer...?

 Biotz baten laguntza

         eta, zer...?

         Geiago!

         Geiago!

 Neure begiakin

 noraño ez eldu?

 Esku me auekin

 zer ez laztandu?

 Zenbatu, zenbatu,

 bat, bi, iru, lau... Bai,

 zenbat gauza nai!

         Nai!

         Nai!

 Ortzerik argitatsuena

         eta, zer?

 Ludirik alaitsuena

         eta, zer?

         Geiago!

         Geiago!

 Eskatuko neuke, eskatu,

         baño zetarako

         eskatu?

 Zertarako bai zertarako

 gizona ezin bada iñoiz

         asetu?