inprimatu
Aitita-amamak
Izenburua:
Aitita-amamak
Sinadura:
Eusebio Erkiaga
Urkizaren iruzkina:
Egilea(k):
Erkiaga, Eusebio

Argitalpena:
Olerti.
Urtea:
1966
Argitalpenaren urtea:
Alea:
1966 I-II Ikus-miran
Orrialdea:
46

Aitita-amamak

 

E. Erkiaga

 

 Etxetik urrun

 bizi zirean

 bai aitita, bai amama;

 txiki nintzala

 joaten nintzan

 beti pozik eurekana.

 

 Aititak buru

 zuria eukan,

 makillatxua eskuan;

 niri jostaillu

 politak gertu

 eta emoten eustazan.

 

 Amama, barriz,

 beti irribarrez,

 arpegi zuri-gorria:

 udan niretzat

 okaran, sagar;

 neguz, intxaur ta eztia.

 

 Gure etxeraiño

 etozanetan

 jaia egiten genduan,

 aitak eta amak

 mai zabala prest,

 ume ta nausi, inguruan.

 

 Etxetik urrun

 bizi izan arren

 gure aitita-amamak,

 lilluragarri

 oi nituan nik

 euren berba ta laztanak.

 

 


inprimatu