Nere ama kutunari

I. Olabeaga

 Eguzki-sartalde dir-dir dana...

 Ugarte arkaitzez esitua...

 Zillar ari garden berritxua...

 Danok zerate Jaunaren lana.

 Soro loretsu erdi-erdian

 ager zeran zitori liraña,

 Jauna makurtu da zure gaña,

 ta jantzi zaitu eder berrian.

 Illunabarrian piztu zitun

 urrezko begik itxu zeudenak,

 luzatu eten gabeko uiñak...

 buru zurikin ikusi nitun.

 Jainkoa eder zalia beti,

 arrats kezkatsu ikusi nuen,

 eder guztiak gallendu naien,

 zerekin ziaro zoratu ni.

 Ordun egin zun, Ama kutuna,

 zure biotza ona xamurra;

 edozer baño ederragua,

 maitasun sua indarra duna.